Publiko, pinag-iingat dahil sa mga holdapan at pagpatay

August 27, 2017 Metro BLISTT

Dahil sa magkakasunod na holdapan at pagpatay sa lungsod ay pinag-iingat ni Mayor Mauricio Domogan ang mga mamamayan.

Aniya ay maging mapagbantay ang publiko laban sa mga kahina-hinalang tao upang maiwasan ang krimen na naghahatid ng takot para sa kaligtasan sa mamamayan at sumisira sa kapayapaan at kaayusan sa lungsod.

Hinikayat din niya ang mga residente na aktibong makilahok sa pagpigil sa krimen sa pamamagitan ng pagbibigay sa mga operatiba ng pulisya ng mahahalagang impormasyon tungkol sa presensya ng mga kahina-hinalang mga indibidwal o bagong mukha sa kanilang komunidad.

Iniutos niya sa mga opisyal at kasapi ng Baguio City Police Office (BCPO) na ipagpatuloy ang lahat ng naaangkop na legal na remedyo sa loob ng kanilang awtoridad upang makilala ang mga may kasalanan ng dalawang insidente ng pagpatay.

Palaisipan pa rin sa kapulisan ang sunod-sunod na holdapan at pagpatay sa mga taxi driver nitong mga nakaraang araw. Patuloy ang imbestigasyon sa mga anggulo ng mga pangyayari.

“Nagpapasalamat kami sa pakikipagtulungan ng ating kapulisan kasama ang mga kalapit na bayan ng Benguet upang lutasin ang dalawang insidente ng brutal na pagpatay na nagtaas ng pagmamalasakit sa mga residente at pagbisita,” ani Domogan.

Nabatid na si Angel Sarmiento, isang driver ng taxi na residente ng Pines Park, Balili, La Trinidad, Benguet, ay ninakawan at sinaksak ng dalawang hindi pa natukoy na salarin, sa Mulberry Alley, Asin Road, Baguio City, habang si Roberto Albino, 47, may asawa at residente ng Asin Road, ay natagpuan patay sa loob ng kanyang taxi sa Badiwan, Poblacion, Tuba, Benguet ngunit ang kanyang koleksyon at personal na mga gamit ay hindi nagalaw.

Panawagan ni Domogan sa mga posibleng saksi sa dalawang insidente na magbigay ng impormasyon sa pulisya para sa agarang pagkilala ng mga suspek upang mapawi ang pagkaalarma ng mga drayber ng taxi at mga residente sa diumano’y muling pagkabuhay ng robbery holdup sa lungsod.

Sinabi ng mayor na ang mga opisyal ng barangay at ang mga miyembro ng barangay peacekeeping action teams ay dapat magsimulang muling pag-aralan ang pagpapatupad ng kanilang mga estratehiya para sa pagpapanatili ng kapayapaan upang maging epektibo at mahusay na makakatulong sa pagpigil ng mga krimen sa kanilang mga nasasakupan nang hindi isinasakripisyo ang kanilang pagsisikap na ihinto ang paglaganap ng bawal na gamot.

Aniya, ang pagkakaroon ng kapayapaan sa mga barangay at lungsod sa kabuuan ay responsibilidad ng bawat mamamayan, kaya kailangan ay makipagtulungan ang lahat sa pamamagitan ng pagbibigay ng impormasyon sa awtoridad. ABN