Proteksyon ng mga lasing sa bars, iminungkahi sa konseho

March 9, 2018 Latest News

LUNGSOD NG BAGUIO – Itinutulak ngayon sa konseho ng lungsod ang pagkakaroon ng “barker” sa mga inuman para sa mga lasing na kostumer upang matiyak na ligtas ang mga itong makakauwi sa kanilang mga tahanan.
Sa mungkahing ordinansang iniakda ni Councilor Joel Alangsab, ay isinaad na magiging tungkulin ng mga establisimiyento na nagbebenta ng alak gaya ng mga bars na magtalaga ng tauhan para magsilbing gabay sa mga sobrang lasing na kustomer at pasakayin sa taxi at payuhan ang taxi drayber na imaneho ito pauwi sa bahay ng kustomer.
Itatala ng mga barker ang pangalan ng kostumer, ang nakarehistrong plate number ng taxicab at itatabi ang mga record at ipapakita sa awtoridad kung kinakailangan para sa kanilang imbestigasyon kung sakaling may mangyaring masama sa lasing na kostumer habang ito ay nakasakay sa taxicab.
Ayon kay Alangsab, lahat ng mga establisimiyento na nagbebenta o nagsisilbi ng alak ay sakop ng batas na ito, una na rito ang mga bar, karaoke bar, videoke, night club billiard at dart hall.
Dagdag ni Alangsab, ang bagong batas ay naglalayong protektahan ang mga kostumer pati na rin ang mga potensyal na aberya o aksidente dahil sa kanilang pagkalasing. Ito ay para narin maiwasan ang pagtaas ng aksidente sa kalsada at trapiko dahilan ng pagmamaneho ng lasing at insidente sa krimen dulot ng sobrang kalasingan.
Kung maipasa ang nasabing batas ay may mga nakaambang parusa para sa mga establisimiyento na hindi magtatalaga ng barker.
Ang panukalang-batas ay naipasa sa unang pagbabasa noong Marso 5 at hihintayin ang pampublikong pagdinig nito. MA. KRYSTAL I. DIOQUINO, UB Intern