Tatlo arestado sa droga sa Cordillera

March 10, 2018 Police Patrol

LA TRINIDAD, BENGUET – Tatlong lalaki ang inaresto ng mga pulis dahil sa droga sa Kalinga kamakailan, kabilang ang dalawa mula sa Baguio City na bumibili ng marijuana sa bayan ng Tinglayan.
Naaresto ng Lubuagan pulis si Dongga-as Rex Gaspi, 25, mula Brgy. Antonio Canao sa nasabing bayan noong Marso 4 kahit sinubukan pa nitong tumakas sa checkpoint sa kahabaan ng national road sa Ayawon, barangay Mabilong.
Ayon sa mga otoridad, kasama ni Gaspi ang dalawa pa na nakasakay sa isang motorsiklo at naiulat na nagpaputok ng baril.
Hinabol ng mga otoridad ang tatlo ngunit si Gaspi lamang ang nakorner.
Nakuha sa suspek ang tatlong plastic sachets na naglalaman ng shabu na may bigat na 5gramo, isang Remington 1911 caliber 45 pistol, magazine na may dalawang bala, dalawang spent shells, wallet na may lamang P14,000 at isa pang cash na P1,250 na nakasiksik sa shirt nito.
Samantala, noong Marso 10 ay nahuli ang dalawang residente ng Baguio na bumibili ng marijuana sa Sitio Mal-o, Barangay Bugnay, Tinglayan.
Nakita ng government agent sina Jeremy Miranda Ona, 24, mula Gibraltar Road, Baguio City at Stephen Job Oyga Blanco, 19, ng Balacbac Road, parehong lungsod, na bumibili ng tuyong dahon ng marijuana sa barangay Proper Butbut, Tinglayan.
Matapos makuha ang mga illegal na kalakal, sumakay ang dalawa sa isang jeepney papuntang Bontoc, Mt. Province.
Agad na hinuli ng mga otoridad ang dalawa na nakapkapan ng tatlong piraso ng tuyong dahon ng marijuana na nakabalot sa brown packing tape na may bigat na 2.35 kilograms at nagkakahalaga ng P293,750.
Ang tatlong suspek ay nahaharap sa illegal drug charges at karagdagang illegal possession of firearms na kaso laban kay Gaspi. AALEGRE