Tatlong motorsiklo, nagkarambola sa La Union

March 17, 2018 Police Patrol

AGOO, LA UNION – Tatlo ang sugatan nang magbanggaan ang tatlong motorsiklo sa Mc Arthur highway sa San Jose Sur, Agoo, La Union noong Marso 12 (Lunes), bandang 4:50 ng hapon.
Kinilala ang mga driver ng motor na sina Dexter Steve Baleroy (30), Johnny Calilim Dela Cruz (40), at Michael John Aspiras (31).
Ayon sa inisyal na imbestigasyon, binabaybay ng tatlong motor ang Mc Arthur Highway patungong norte nang magsabay na mag-overtake ang motor na minamaneho ni Dela Cruz at ni Aspiras. Natabig ng motor ni Aspiras ang motor ni dela Cruz na siya namang bumangga sa nasa unahang motor na minamaneho ni Baleroy. Gumulong-gulong ang tatlong motor sa daan.
Isinugod sa ospital ang angkas ni Dela Cruz na si Mailyn Dela Cruz (47), na kritikal ang kalagayan ngayon sa Ilocos Training and Regional Medical Center.
Kapwa nagpapagaling ngayon sa La Union Medical Center sina Dela Cruz at Aspiras, na parehong residente ng Lomboy, Sto. Tomas, La Union, samantalang walang tinamong galos si Baleroy na taga Sta. Lucia, Aringay, La Union.
Bukod sa walang plaka ang mga motor na minamaneho nina Baleroy at Aspiras ay wala pang karagdagang ipapataw na kaso habang umuusad ang imbestigasyon.
Itinuturing na accident prone area ang lugar kung saan naganap din ang malagim na aksidenteng sangkot ang isang jeep at pampasaherong bus noong nakaraang Pasko kung saan 20 ang namatay. Hindi naman nagkulang ng paalala ang awtoridad sa dami ng mga karatula sa gilid ng kalsada. CHRISTIAN JASTINE V. MENDOZA, UC Intern