Wayawaya, marikna iti panagkaykaysa – Gob. Pacoy

SIUDAD TI SAN  FERNANDO, LA UNION  – “Mariknak iti wayawaya babaen iti panagkaykaysa dagiti ili ken siudad ti La Union agraman dagiti probinsia a mangbukbukel iti pagilian.” 
Datoy iti inyunay-unay ni Gobernador Francisco Emmanuel “Pacoy” R. Ortega III iti bitlana para iti panagrambak iti Probinsial a Gobierno ti La Union (PGLU) ken City Government of San Fernando (CGSF) para iti maika-119 nga independensia ti pagilian a Pilipinas a naisayangkat idi Hunio 12, 2017 iti sangu ti San Fernando City Hall.
Innayonna a panagkaykaysa pay laeng iti kapigsaan a wayat iti La Union tapnu sumayaat ti panagbiag. Addaan iti tema a “Kalayaan 2017: Pagbabagong Sama-Samang Balikatin,” inawis ni Pacoy ti publiko nga utubenda ti kinapateg iti independensia tapno maamirisda dagiti anyaman a manglalaped iti panagtaginayon iti panagkaykaysa ken panagbaliw.  Kinunana pay a ti Transformative Governance ti kasayaatan a dalan para iti panagbaliw. Kasapulan a saan nga agsardeng dagiti gannuat ti development stakeholders gapu iti anyaman a nam-ay a nannanamen tatta iti probinsia.
Kas pinagbigbig iti liderato ni Presidente Rodrigo Roa Duterte, inyebkasna a kasapulan nga iwayat dagiti barangay, ili, siudad ken probinsia iti direksionda nga agturong iti panagbaliw iti entero a pagilian. Inawisna dagiti nakirambak a kameng iti PGLU, CGSF, Philippine National Police (PNP), Philippine Navy (PN), Philippine Coast Guard (PCG), Bureau of Fire Protection (BFP), Association of Regional Executives (AREX), Mason ken DeMolay a sangkamaysada nga agbiag, agarapaap ken aggunay tapnu tumayok manen iti Pilipinas. Iti panagmaymayasa dagiti gameng iti amin nga agay-ayat ti La Union ket mangiduron iti sangkapada a pannakaiwaras iti gundaway para iti nasayaat a biag para iti amin. 
Inyebkas met ni Mayor Hermenegildo A. Gualberto iti ragsakna gapu iti aktibo a partisipasion dagiti ubbing iti nasao a programa.  Kinunana a dagiti agtutubo ti agsagsagrap kadagiti inlaban dagiti appotayo.  Iti kinaaddada ti pammaneknek iti panangipategda kadagiti sakripisio dagiti appotayo a nagbuis iti biagda para iti independensia. 
Kinablaawanna pay dagiti pulis ken militar nga imay nakirambak. Inbagana nga uray awanda iti siudad ti Marawi a makigubgubat, banwarda latta a makuna babaen ti panagtaginayonda iti urnos ken talna iti siudad ken probinsia.
Dagiti dadduma pay a paset iti nasao a programa ket pakaibilangan ti panangipaay iti balangat ken 21 gun salute iti batonlagipda Dr. Jose P. Rizal ken House Speaker Pro-Tempore Francisco Isabelo L. Ortega; Ecumenical Prayer; Balcony Flag Waiving; ken panangiparang iti plano para iti baro a San Fernando City Plaza. ISRAEL O. RUDIO, PITO-LU / ABN

Amianan Balita Ngayon