‘Zero’ ti kaso ti rabis iti Ilocos Norte iti uppat a tawen

November 10, 2018 Provincial

SIUDAD TI SAN FERNANDO – Napagtalinaed ti lokal a gobierno iti Ilocos Norte ti “zero case” wenno kinaawan kaso ti rabis kadagiti tao a nakagat ti aso iti probinsia iti uneg ti nasurok nga uppat a tawen.
Iti rekord ti Department of Health (DOH) iti Rehion 1, nangrugi idi 2014 agingga iti Oktubre 2018 awan ti nailista a kaso ti rabis iti Ilocos Nore.
Gapu iti daytoy a report, siraragsak a kinuna ni Dr. Loida Valenzuela, agdama a provincial veterinarian iti Ilocos Norte, a naadalanen dagiti umili iti umiso a panagannad kontra iti pannakakagat ti aso.
Ngem dinawat ni Dr. Valenzuela ti naan-anay a suporta dagiti umili iti agtultuloy a kampania ti opisinada kontra ti rabis.
Ta ngamin, maobserbaranna nga adda dagiti umili a saanda a kayat nga ipabakuna ti “rabbies vaccine” dagiti tarakenda nga aso ken saanda nga iruam nga igalut dagitoy.
“Agbalintayo koma a responsable nga agtartaraken ti aso, masapul a mapabakunaan dagitoy nga aso; ken iruam nga igalut dagitoy tapno masalluadan ti mabalin a pannakakagat dagiti umili kangrunaanna dagiti bisita a pumaspasiar ditoy Ilocos Norte,” kinuna ni Valenzuela.
“Saan la a dayta, no nakagalut ti tarakentayo nga aso, maliklikantayo pay ti mabalin a pannaka-aksidente dagiti nakamotor nga agdalliasat kadagiti kalsada iti lugartayo,” innayunna.
Iti rekord ti polisia, adda sumagmamano nga aksidente ti motorsiklo a napaspasamak iti kallabes iti Ilocos Norte gapu iti panangliklik dagiti agmanmaneho kadagiti bulos nga aso iti kalsada.
Kabayatanna, impakaammo ni Valenzuela a mapan tumulong ti opisinada iti ili a Banna inton umay a lawas para ti panagbakuna ti “rabbies vaccine” kadagiti taraken nga aso dagiti umili.
Kiniddawna kadagiti katulonganda iti amin a munisipio iti Ilocos Norte nga ileppasda ti panagbakuna kadagiti aso sakbay nga agngudo ti tawen.
Impanamnamana nga adda nakasagana a suplay ti “rabies vaccine” iti opisinada.
Impakaammona pay kadagiti umili iti Ilocos Norte a mabalinda pay nga ipabakuna dagiti tarakenda a pusa. FREDDIE G. LAZARO, PIA-1 / ABN