Ay pimpiman kayo met, naupay a namnama!

October 9, 2017 Opinion Sirmata ken Tagtagainep ni Mang Gusting

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria ken makinnisem kadakayo babaen iti ABN. Naimbag nga oras kadakayo amin nga awan malabusan este malabsan kunami koma. No dakami met ditoy batugmi a langit, ti kayatyo a maamuan, sus maria kusina, saan a maawatan ti paniempo na. Agngalay manen ti bulan ti Oktobre ngem ania ngay daytoy a tiempona? Ditoy ayanmi kakayong agtodo latta no kayatna ket ay inayan pay, pakaalaan iti sakit ta kasta unay nga init na iti agsapa agingga iti aldaw ngem iti mumalemen kellaat nga ibayakabakna, ania pay ngay, sumabengkan no awan natugotmo a payong mo.

Opssss, ania ngay Kayong Angkuan, damagko a panggep mo ti agpailayon a barangay chairman ta ti ammom ket matuloy ita nga Oktobre ket nangrugi koma ti panagipila iti kandidatura idi petsa a singko. Ngem, sus maria kusina, maysa ka met kadagiti naim-ima ania ta dua laeng nga aldaw kalpasan a naipakaammo a mangrugin ti panagipila iti kandidatura iti petsa singko daytoy a bulan, pinirmaan met ni Presidente Digong ti maysa nga executive order a mangitantan iti Barangay elections iti daytoy koma nga Oktobre 23 ket maituloy inton umay a Mayo 2018. Isu nga ay, awan, kasta unay a nalpay ti abaga dagiti agpangpanggep a sumukat a kagawad kangrunaan dagiti agtagtagainep a Barangay Chairman. Tay kunada ngarud a “nga-nga!” Hahaaha, ay inayan pay iman, pimpiman kayo met, naupay a namnama kas iti daydiay agpangpanggep a sumukat ditoy numo a kas Chairman ti Barangay Nagbugsotan, hahahaha.

Wen Kakayong ko dita, talaga a kasta ti biag a kunada. Adu ti nakasarsaritak idiay ili a kasta unay pannakaupay da gapu iti dayta a damag. Ngem ti makuna mi, adu ti naupay, adu met dagiti maragsakan ta masilpuan ti panagtakemda ken panagawatda iti honorarium. Nga uray awan met maar-aramidanda wenno naaramidan da iti uppat a tawen ta idi napalabas nga Oktobre koma ngem naitantan manen. Ita naitantan ket inton umay a Mayo kanu manen. Asino dagiti maragsakan? Dagiti ngarud di mangnamnama a mangabak pay no adda koma eleksyon ken dagiti ag-graduar a kuanda ta naka-3 terms dan. Maikadua a naupay wenno nasakit ti nakemna? Kangrunaan dagiti kayatna ti ag-barangay chairman. Ay piman aya kunak manen…

Speaking kadagiti agdama ken mabalinna pay kumandidato, madanaganda ta saandan a namnama ti pannakaibotosda manen ta kasano, akinse-katapusan met laeng ti kaaddada wenno ipapanda idiay barangay hall. Ngem iti sabali a bangir, kadagiti adu’t nagapuananna ken nasayaat ti rekordna bayat ti panagtakemna, uray saandan nga agkampania Kayong ta segurado nga isuda met leng manen ti ilayon dagiti kabarangayanda. Ngem no dakami ti kayatyo a damagen, mas adu ti maitedna a pagsayaatan koma no natuloy tapno madistugawen dagiti barangay official a di pulos nag-function. Kas naibagbagamin iti kallabes, nga uray ulila la koma a baragay resolution ti naputar da para iti pagimbagan dagiti bumarangay, pulos nga awan. Puweee…panawen koman a masukatan dagitoy babaen iti panagpili kadagiti maiparbeng wenno maikari nga ag-official saan ket a dagiti laeng panggepda ket ti honorarium a maawatda ken pannakaawagda iti kagawad. Sus maria kusina, bari-bari, puwera an-annong, batu-bato sa langit ang tamaan bukol. Buwaaahaaa… mangrikna kayo met!

Ne, ne, ne, Kakayong naimasantayo manen a kunak isu a baliwantayto manen, a. Opsss, aglisika man met iti pagnaak sika Atong, addaka manen a kunak, pasalsali ka a kanayon. Ania manen ti masapulmo aya? Makalag a numero? Sika met, kubrador ka idi kubrador ka pay laeng agingga ita. Ala man laengen, sige, kalagem man tay opisyal a sansanuong. Babayooo, tsuptsup muahmuahhh.