Lasing na tatay, tinangay ang 2-anyos na anak

October 14, 2017 Police Patrol

Sa kasalukuyan ay hindi pa mahagilap ang isang diumano ay lasenggo na ama matapos nitong tangayin ang 2-anyos nitong anak na babae, hapon ng Oktubre 8 sa Purok 4, Dontogan Baguio City.
Dumulog sa Station 10 ng city police office sina Marcy Joy Cacdac, 25, at residente ng Samulog, La Trinidad, Benguet; at mag-asawang Brendesi Mendoza, 66, at Lourdes Mendoza, 58, kapwa residente ng Purok 4, Dontogan, Baguio City, bandang 8am ng Oktubre 9, 2017 upang ireklamo ang suspek na si Jeffrey Bravo, taxi driver, at residente ng Fairview, Baguio City.
Ayon sa mga naghain ng reklamo, kinuha ng suspek at hindi pa ibinabalik ang dalawang taong gulang na apo ng mag-asawang Mendoza.
Ang suspek ay biological father ng bata at live-in partner ni Kathlene Mendoza, anak ng mag-asawang Mendoza.
Ayon sa ulat, bandang 4:45pm ng Oktubre 8, ang suspek na diumano’y nasa ilalim ng impluwensiya ng alak ay nagpunta sa Dontogan at nilapitan si Cacdac na siyang may hawak sa bata, at pilit na inaagaw ito. Tumanggi si Cacdac na ibigay ang bata subalit naglabas ng patalim ang suspek at iniumang sa beywang ni Cacdac. Dahil sa takot, napilitang ibigay ni Cacdac ang bata sa suspek na agad umalis dala ang bata at sumakay sa isang taxi na di nakuha ang plaka.
Sa panayam sa mag-asawang Mendoza, umalis ang anak nilang si Kathlene noong February 2017 upang magtrabaho sa Hongkong at iniwan ang apo sa kanila. Ibinilin ni Kathlene sa magulang na huwag ibigay ang bata sa ama nito dahil sa paglalasing nito at kawalan ng kakayahan na mag-alaga.
Subalit, puwersahan at may pananakot na kinuha ng suspek ang bata.
Nagpunta ang mga tauhan ng PS10, BCPO sa tirahan ng suspek sa Fairview, Baguio City, subalit sinabi ng kapatid nitong lalaki na ang suspek ay hindi na doon nakatira. Ang kaso ay nasa follow-up investigation.