LTO Baguio, nahinto ang operasyon dahil sa bomb threat

February 17, 2018 Police Patrol

Inihinto ang operasyon ng Land Transportation Office (LTO)-Baguio dahil sa isang anonymous text message na sinasabing diumano ay mayroong bomba sa kanilang tanggapan.
Ayon sa ulat ng Baguio City Police Office Station 3, ang information officer ng LTO na kinilalang si Roselle Cruz ay nakatanggap ng text message na nagsasabing mayroong bomba sa labas ng naturang tanggapan at ito raw ay sasabog sa ganap na ika-2 ng hapon ng Pebrero 13.
Dagdag pa ni Cruz, ang mensahe ay nagtapos sa “Al’lah Albar!”
Agad na inabisuhan ni Cruz ang nakakataas na opisyal ng LTO na nag-ulat sa BCPO Station 3.
Kaagad namang umaksyon ang Explosives and Ordinance Division at K9 units sa tanggapan upang magsagawa ng imbestigasyon at siguraduhin ang seguridad ng tanggapan.
Matapos ang masusing imbestigasyon, walang nakitang kahit anong explosive device sa paligid at sa loob ng tanggapan.
Patuloy ang ginagawang imbestigasyon ng pulisya ukol sa pagkakakilanlan ng nagpadala ng mensahe sa tanggapan ng LTO.
Hindi ito ang unang bomb threat na natanggap sa siyudad ng Baguio.
Matatandaang Pebrero noong nakaraang taon, libo-libong mga mamimili sa isang malaking mall sa siyudad ang nabalutan ng takot nang dahil din sa isang bomb threat.
Dahil dito, pati ang mga residente sa kalapit na mga bayan ay nabahala at mas naging maingat sa iba pang pampublikong lugar.
Noong 2014, nagmartsa papalabas ng University of the Philippines-Baguio ang mga mag-aaral matapos makatanggap ng bomb threat ang isang opisyal ng paaralan.
Sa parehong taon, nakatanggap din ng bomb threat ang Saint Louis University.
Laking pasasalamat ng mga residente ng Baguio na kahit halos taon-taong nakakatanggap ng bomb threat ang siyudad ay alerto pa rin ang mga kapulisan sa pag-responde sa mga ganitong pangyayari. RC BJON C. CATACUTAN, UB Intern