Oplan Double Barrel Reloaded sa LT, matagumpay

March 25, 2017 Police Patrol

LA TRINIDAD, BENGUET – Matagumpay na isinasagawa ng La Trinidad Municipal Police Station (LTMPS) ang bagong Oplan Double Barrel Reloaded mula nang inilunsad ito.
“Nitong week na ito, nag-umpisa kami ng March 13, na-account namin is 64 out of 236. Kasi 236 ang surrenderees namin,” ayon kay Police Chief Inspector (PCI) Benson B. Macli-ing, hepe ng LTMPS.
Aniya, ang kaibahan ng bagong oplan ay kailangang mayroong kasamang miyembro mula sa religious sector, faith-based o pari; barangay captain o barangay officials, at ang chief of police o present commander ng bayan sa pagsasagawa ng house visitations.
“Mahirap kasi yan kasi house to house, parang nag-uumpisa ka ulit kaya kailangang puntahan mo. Pag nandiyan siya, e di swerte mo, pag wala siya, e di malas mo di ba? Kailangang ma-account mo mismo sa kanilang bahay-bahay yan. Pag nabisita mo na sila, i-biographic profile mo ulit sila kung anong nagyayari ulit sa kanila ngayon,” dagdag niya.
Nagsimulang mag-house visitation ang grupo sa mga barangay ng Alapang, Bineng, Pico, Tawang at Poblacion, kung saan rin nagmula ang 64 na una nilang na-assess.
“Okay naman ito, maganda rin kasi parang monitoring siya para titignan mo ulit kung talagang nagbago ba siya or hindi kahit pumupunta sila dito, maa-assess mo pa rin, so magandang programa din yan,” ani Macli-ing.
Target ng grupo na matapos ang kanilang pangkalahatang assessment sa mga surrenderers hanggang sa susunod na buwan. Melanie Z. Dela Cruz, UB Intern