Umay manen dagiti didgra

June 25, 2017 Opinion Sirmata ken Tagtagainep ni Mang Gusting

Hellooo, hellooo…naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Kayatdakayo laeng met a kumustaen no ania metten ti mapaspasaranyo ita kadagiti ayan yo. Ta no dakami ditoy siruk ti kasalengan, adtoy minalemen ti todona. Ket sapay la koma ta kasta met dita luglugaryo ket marugyanyon ti mangisagana kadagiti talon ken bangkag yo ta saanen a malapdan ti isasangbay ti makuna a matotodo.

Agingga ita a masursurat daytoy a kolumtayo Kayong, adda latta pay parikut iti umabagatan a paset ti pagilian ket nanayonan ti bilang dagiti natay iti benneg ti armada ti pagilian ken dagiti makuna a rebelde a nangsakup iti maysa a lugar ket naaramat dagiti umili kas human shield a kunada. Nakakaasi dagitoy a kakabsat tayo, Kayong Angkuan. Anian a panagpampanunot ti pada a parsua Kayong. Anian a kinaawan daldalem ken batikuleng este panagpuspuso kunatayo koma gapu laeng iti bukod nga interest wenno gagem, didan panunoten ti pannakairamraman dagiti inosente a tattao a maperhuisio. Hay naku Kayong Angkuan, ni latta Juan dela Cruz ti makuna a daksanggasat. Ngem, ania ngarud ti mabalin ket nangisit ti negro a kunada.

Ala, Kayong Angkuan, awan mabalin tayo saan a mangawat lattan kadagitoy a pagteng ti biag. Ti ketdi aramidentayo, agsagana ta panawen manen ti isasangbay dagiti nadumaduma a didigra a parnuayen ti nakaparsuaan kas koma iti bagyo, layus, reggaay, storm surge a kunada wenno panagdawel ti baybay ket uray la sumalpa iti takdang, ken ania pay dita a didigra wenno kalamidad ita a panawen ti nepnep a kunada. Koma, daytoy manen ti kitaen ti administrasion ni Presidente Duterte ket sapay koma ta saantayo manen a pasaren dagiti didigra kas kadagiti napipigsa a bagyo a nangsaplit iti sumagmamano a paset ti pagilian a no sadino ket adu ti natay ken nadadael a sansanikua. Ti makunatayo, Kayong Angkuan, no kasta koma nga adda kalamidad, agsisinnaranay saan ketdi a gundawayan tayo dagiti kailian nangruna kadagiti biktima.

Makapaladingit kailian nga idi dimmalapus ni bagyo Yolanda iti pasetna ti Kabisayaan partikular iti Tacloban City, adu nga agpayso ti nagsangpet a tulong kadagiti biktima, saan laeng a manipud kadagiti kakabsat tayo a Filipino ngem manipud pay sabali a pagilian. Ngem ti nakas-ang, adu dagiti nagbalin nga isyu porke imbulsa dagiti opisyal ti donasyon ken adu pay ti natakuatanda a nabulok a relief goods a di naidanun kadagiti maseknan. Bakit ganun? Apay a kasdiay? Sinong nangyari este anong nangyari?

Hay naku, amangan no tay carne norte ket nasukatan manen iti sardinas? Sus maria kusina a biag daytan, di met ngarud dagiti kasta ti aramidna ti makapadas iti kalamidad tapno ammoda. Sus Apo, pakawanendakami no masaomi man daytoy. Maluksaw kami laeng gapu kadagiti naidamdamag mi ken nabuybuyami iti TV a damag maipapan kadagitoy a maseknan nga opisyal. Apay, inton makurusan iti apog dagiti dapanyo, maitugotyo dagita a kinabaknang yo? Sus Apo aya ket ti taon aya. Narigat ti mangirurumen wenno mangilunod ngem ditay malapdan no sumken kadatayo ti luksaw!

Alan Kayong Angkuan, kasta pay ta ne, narigaten no data met ti madalapus ti tidal wave no di maurayen ni Sofing ti pinagatangna a betsin. Babayooo, tsuptsup muahmuah.