Agasem data, pudno ngata nga awan basolda?

March 17, 2018 Opinion Sirmata ken Tagtagainep ni Mang Gusting

Naimbag nga oras yo amin kailian ken kaarruba, adtoy manen ti nanumo a pagayamyo nga umay maki-abrasa ken makinnistoria ken makinnisem kadakayo babaen iti ABN. Sapay la koma ta pia ken nakaradkad latta ti adda kadakayo a sangbayan manen daytoy kolum tayo ket makaipaay kami manen iti ray-aw ken impormasion kadagiti mapaspasamak iti aglawlaw tayo. Saan koma ngarud a dagsensen ti barukong ti intay pasaren, Kakayong mi ida.

Sakbay man nga intay rugyan toy kolum tayo kakayongmi ida, adtoy man pay ti ababa a parungiit este pakatawa, no makakatawa kayo, ah. Nagtagtagainep ni Mang Gusting a simrek kam pay idi a driver ti maysa a baknang ket kastoy man ti napasamak…

Iti maysa a bigat, pina-check up ni Miss Melanie nga amona ti preno ti kotse daytoy…ket—

Gusting: Ma’am Melanie, diak natarimaan ti preno diay kotseyo.

Melanie: Amm, kasano ngaruden? Awan remedionan, Mang Gusting.

Gusting: Adda ma’am… aregladon. Mabalinyon nga usaren!

Melanie: Good, ania ngay ti inaramidyo, Mang Gusting?

Gusting: Ma’am, kua… pinapigsak ti bosenana, iti kasta aglisida no sumungadkan.

Waenggggggggg…

Iti kallabes kailian, nagbalin a kangruanan nga isyu ti pannakawaswas ti darum kontra kadagiti maatap a bigtime drug trader. Segun iti korte a nangadal kadagiti kasoda, nagkamtud kanu dagiti pannakabagi ti linteg, idinto ta inamin sa payen ti maysa kadagiti suspect ti basolna. Ano ba yan, talaga kadi a kasta ti taray ti linteg ken hustisia ditoy pagilian tayo. Ngerm ti masegurado mi, no gagangay laeng nga umili dagiti nakasuan, swakk…malungsotdan iti pagbaludan.

Ti saludsod, pudno ngata nga awan basolda? Ngem kas iti nakunami itay no dikam agbiddut, inaklon ti maysa kadakuada ti basolna ngem – sus ina aya, ania nga agpayso aya. Nupay kasta, kuna dagiti adda iti benneg ti gobierno nagapelada ket mangnamnamada a mabaliktad met laeng ti pangngeddeng ti korte, sus ina, nagadu ketdin aya nga arte.

No maminsan, mapukpukaw ti panagtalek dagiti umili iti “hustisia” agsipud ta adu ti mangibaga a ti hustisya ditoy ayantayo, malaksid a naginad no maminsan, para laeng kanu kadagiti babaknang ken nangangato a tattao ti hustisia. Unfair kunada, ta no marigrigat ti suspect, swak a dagus iti pagbaludan ket malungsot dan idiay.

Adun dagiti napaliiw tayo a kasta ken nabasbasa tayo, nangruna kadagiti kaso dagiti nakurapay. Isu la ngaruden ti biktima, mabaliktad to pay laeng ket isu ti agtinnag a suspect ket isu pay ti mabalud. Ala, sapay la koma ta saan a mapukaw a mamimpinsan ti talek dagiti umili iti taray ken sestima ti hustisia ditoy pagiliantayo.

Iti sabali a bangir, adda manen ti naaramid a katulagan ti nagbaetan ti gobierno ti Pilipinas ken Kuwait para kadagiti kailiantayo nga OFW ngem adda kiddaw ti Pilipinas a maipaayan koma iti hustisia ti napasamak iti kailian a nasarakanda iti freezer. Iti panagkunayo, kailian, dakayo man ti pagdamagak…magun-od ngata ti kailiantayo dayta a hustisia?

Ne, ne, ne, Kakayong naimasantayo manen a kunak isu a baliwantay to manen, a. Kasta pay pare Jun, Editor Thom, agkakape tayo man no maminsan dita opisina, mailiwak met a maki-innistorya ken maki-igup iti kape kadakayo. Kasta pay, babayooo. Tsuptsup muahmuah.