Dumi ng pulitika….. Salot sa lipunan!

June 18, 2022 Daplis Walang Mintis

Tapos na ang halalan. Inagurasyon para sa pagkapangulo at bise, hinihintay. Exit ni Pres. Duterte at entrada ni BBM sa Malakanyang…ilang tulog na lang. Punadong habang lumalapit ang pagpapalit ng administrasyon, sala-salabat na ang mga nagaganap na mga kontrobersiya.

Una – presyo ng bilihin bugso ng taas-presyo ng langis. Dahil dito, naglalabasan din ang galing ng kuno ay mga eksperto sa paghahanap ng solusyon sa mga kahaharaping problema. May upak agad ang mga mahilig sa kontra-kumpas: bakit daw ngayon lang lumalabas ang kanilang galing. Sana ay noon pa. tsk tsk…ganyan talaga ang ating bansa. Parang daloy ng tubig – kung saan ang masalimuot na daan, pilit doon dumadaloy. Only in the world talaga ang Pilipinas!

Ang isang sulpot-isyu ay ang pangyayari sa Cebu kung saan matigas ang paninindigan ni Gov. Garcia sa kanyang EO kontra sa pagsusuot ng face mask. Kinontra ito ng DILG at IATF pero sing-tigas ng bato si Garcia.

Tanong: alin ba ang dapat umiral? Utos ng nasyonal na gobyerno o ang utos ng LGU? Tuloy lito ang PNP na naatasang kumilos laban sa mga di nagsusuot ng face mask. Pati nga ang provincial commander ng PNP dito ay inalis na sa puwesto dahil diumano ay medyo kampi kay Gov. Gwen. Iisa naman ang upak ng ating mga kababayan: para sa kapakanan sana ng nakararami…sundin ang itinatadhana na Health Protocols.

Daplis nga ng DOH pati na ang Octa research na tataas pa ang bilang ng Covid cases sa hinaharap dahil sa dami ng mga pasaway. Ang nakakaalarma sa ngayon ay ito: sabay na bumabanat ang Covid -19 at Dengue.

Sa huling ulat ng DOH…isa ang Cordillera sa mga may matataas na kaso ng Dengue. Suma-total, balik tayong muli sa oplan kontra lamok. Matagal na tayong nagsasagawa ng mga defogging na tinatawag.

Malaki na ang nagastos ng gobyerno hinggil dito. Pero bakit parang sumasablay yata ang hakbang na ito kontra lamok? Sabi nga ng mga observers: kaso nga, kahit e-defog mo ang isang lugal, lumilipat naman sa ibang lugal ang mga pesteng lamok. Kaya iisa ang solusyon, daplis
ng marami: kalinisan ng paligid. Tsk tsk…walang pinag-iba ito sa kalakaran sa ating pamahalaan, pards. Magsibak man tayo nang magsibak sa mga peste sa lahat ng ahensiyang may mga anomalya …..may mga peste pa ring papalit na salot. Masahol pa sa lamok ang tinamaan ng pesteng mga ire. Daplis : kaya ba ito ng susunod na administrasyon ? Abangan!

Pinaka-praktikal na problema sa ating lipunan ngayon ay ang kaayusan ng mga daan. Siglo na ang dumaan, pero ito pa rin ang sumasabay na problema sa ating pag-unlad.

Diyan na lamang sa NCR…sa pagdami ng tao, lalong kumapal naman ang dumi. Buti pa sa mga probinsiya, ika
nila…malayong malinis kaysa sa mga siksikang lugal. Isa na ang Buguias, Benguet na nakilala sa pagpapaganda at paglilinis sa kanilang mga lansangan. Di ba ito kaya ng ibang lugal? Isang dagok naman dito sa Baguio ang isyu ng bandalismo.

Mga pader at pati na ang mga overpasses…may mga lamat na ng mga kung ano-anong nakasulat (bandalismo) na marumi sa paningin. Ito ba kaya ay pagpapahiwatig ng patuloy na pamamayagpag ng mga kontra sa kasalukuyang administrasyon?

Ang pagdudumi kaya sa ating lipunan ay pahapyaw pa rin ng mga kontra-kumpas na may bahid-pulitika?

Haayyy buhay….sana sa pagpapalit ng administrasyon….maiba naman tayo ng pondasyon – pagpapatatag ng pagmamalasakitan at tulungan para sa matatag at maunlad na bukas ng ating lahi.

Alaala pa ang sipa noon ni Makoy: SA IKAUUNLAD NG BAYAN, DISIPLINA ANG KAILANGAN! Ano naman kaya ang sipa ni BBM? Adios mi amor, ciao, mabalos!