Kari ditoy, kari idiay – Part 2

October 21, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan, sukimi.

Octobre 17, 2018, maudi nga aldaw a panagipila iti kandidatura wenno Certificate of Candidacy dagiti nag-pangpanggep a pabotosan kadagiti nagduduma a posisyon wenno takem manipud senador agingga iti municipal councilor wenno sangguniang bayan. Ania ngay Kayong Angkuan, nakaipilaka met laeng?

Segun iti damag, Kayong Angkuan, adu dagiti kabarbaro a kandidatu, adu met dagiti mangpadas manen ta saanda a napagasatan iti napalabas nga election. Adu met dagiti nagpaso ti terminoda ket kayatda manen ti pabotosan, adu met dagiti nag-graduate ket pabotosanda iti nababbaba wenno nangatngato a takem. Adda met dagitay pinasublatda ti anak wenno asawada, sadanto manen agsubli. Adda met dagiti agkabsat, agkasinsin nga agtaray wenno aglaban iti maymaysa a posision iti lugarda…wat a lyf, onli in da pilipins, hahahaa.

Wen man Kayong Angkuan, no maminsan makauma metten. Kasla ketdin nga awan makabaael wenno awanen sabali. Ti saantayo a maibus a panunoten no ania ba a talaga ti rason, kasta kadi kapigsa ti batum-balani ti pulitika? Adu ti agsisina wenno aggiginnura nga agingga iti agkakadaraan gapu iti pulitika. Ti maysa pay nga intay napailiiw, duduoganen iti pulitika ngem nakisawsaw pay laeng. No labsem ti agsao, agkabawen ngem sus maria kusina, banat latta…nagipila pay laeng met piman, saan laeng nga iti national, uray iti lokal. Adda dagidiay nag-graduate a mayor, nag-congressman iti unos ti 9 a tawen a mayor ken kasta met iti congressman, ita a nagpaso a mayor agsubli manen a congressman, ano ba yan. Ited met kadagiti dadduma, a. Ngem ala, kakailianmi ida, adda kadatayo daytan ta seguradok kari ditoy, kari idiay manen ti pamay-anda. Ti dakesna no maikarida manen diay bulan, isu a kitaen tayo koma dagiti talaga a makapagserbi saan ketdi a simrek laeng iti pulitika ta agpabaknang da. Batu-batu sa langit tamaan bukol, hehehe.

Umuna koma nga intay ikonsidera kakailian ket ti family background na, ti platapormana…no siak kayong. Ngem uray kunana a maka-Diyos, maka-Tao, maka-Kalikasan, saan a basta agtalek ken mamati…kanayon a kasta ti karida. Makakalikasan ngem ania ngay, nagsasaruno ti kalamidad maipapan iti pannakaramesen ti nakaparsuaan nangruna kadagiti kabakiran tayo ngem awan pay nadamagko a nagmulada iti kayo tapno agsubli ti kinangayed ti aglawlaw. Dayta koma ti maysa kadagiti ipangpangrunada, ngem, awan. Ti makunami, napigpigsa latta ti sileng ti pirak a mangbulsek, mangpakudrep iti mata ta uray nakamulagat a makita dagiti di maiparbeng, kasla nga awan makitkita weno nakitada.

Sus nalpas ti ani, anak ti tukling a balo, kasta pay kakayong ta ne overtime tayo manen ket…ala, aglisi ka man dita Atong. Ania man ta isensenyasmon? Anunsio iti hueteng… agingga ita, dayta pay laeng ti ubram, ala, ala, kalagem ngarud tay lakay a kandidato nga agkabaw hahaha! Kasta pay ket ne, nakaadu tayo manen, babayoo, tsup tsup muahmuah.