Taul a taul, awan met kaykaya na!

July 30, 2019 Sirmata ken Tagtagainep ni Mang Gusting

Ania ngay Kayong Angkuan, kumusta jay pustam ken Thurman? Isunsa met ti pinustaam ta naglaing nga agtaul este sumao.

Abak na pay diay aso nga agtiwel a permi’t taul na wenno bulastug na ngem first round pay laeng nabagtuogen ti salbag a Thurman. Ngakngak a ngakngak a tumbaen na ni Sen. Manny Pacquiao iti umuna agingga iti maikatlo a round ngem ania ngay, umuna pay laeng a rikus, nagrikusen ti ulona este nanabtuogen.

Iti nalikud a kolum tayo, ti napalabas a laban ti Pambansang Kamao ti nakaisentroan ti topiko tayo. Ammom, Kayong Angkuan, nagdakkel ti naibati na nga adal kadatayo daydiay a kalaban ni Senador Pacquiao ken kinalaing na a sumao ni Thurman.

Ania nga adal kunam, Kayong? Umuna, saan mo a gatadan wenno kedngan ti kabaelan ti kalaban mo, aniaman a dangadang dayta. Maikadua, narigat ti sao a sao ta aramid ti pakakitaan.

Maikatlo, awan kas itay humble wenno napakumbaba. Kas iti inaramid ni Thurman, ania ngay ti napasamak idi malpas ti laban da ken Senador Paquaio? Kasla nakutoran a piek wenno nalpes nga uong.

Ket no pudno, segun iti napaliiw dagiti marabutit este adda iti benneg na, agasem ta rumrumuar sa iti X-Ray daytoy nga adda natukkol a tulang na?

Pakayangem este pakawanem kunak koma. Agasem a pigsa ngay a danog dayta. Sabagay, nakita tayo ti panag-kiet ni Thurman idi manabsiit ti kannigid ni Sen. Pacquiao iti kannawan a bakrang na, a sinaruno ti maysa a left hook a nakapatugawan ni Thurman.

Iti dayta a laban ni Sen. Manny Paquiao, napaliiw tayo ti panagkaykaysa manen ti amin a Filipino. No adda man dagiti kontrabida, isu dagiti umapal kenkuana ta agasem, saan laeng a ditoy Pilipinas ti nagsikatan na ngem ketdi entero a lubong.

Kakaisuna a Senador ken nagbalin a champion iti boxing ken agasem pay, nataenganen ni Sen. Paquiao ta kuarenta anyos nan, ngem di pay la napadso ti agkabanuag a trenta anyos a ni Thurman nga imbagbagana a masapul nga agreteron ken agbasketball laengen ti Pambansang Kamao.

Adda nagkuna a sikat kanu unayen ni Sen. Manny Paquiao ken ania ngay ti naaramidan na para iti pagilian? Sus, sumangka-kuneng ken bulsek dagiti nagkuna iti daytoy. Nagadu ti naaramidan na nangruna idiay lugarda. Adu ti natultulongan na a di naggapu iti kuarta ti umili ngem ketdi, naggapu iti mismo a bulsa na.

Ibaga ketdin nga awan naararamidan na? Sus, bukiraden yo met a dagiti mulagat yo. Duldog kayo a mangibaga nga awan naaramidan na iti sambayanang Pilipino a kunayo. Nagdakkel a dayaw ti impaay na iti pagilian tayo. Agasem ngay a dayaw dayta.

Naglawa ti lubong ngem naggapu pay laeng iti nagbassit a pagilian ti nagtaudan ti kasikatan a boksingero iti entero a lubong? Ala, awanen makuna mi no saan a ti nabara a kablaaw iti Boksingero a Senador wenno Pambansang Kamao, Manny Paquiao. Congratulations!