Bilang dagiti nagsangpet a turista ken balikbayan iti Ilocos Norte, ngimmato

January 11, 2019 Community Billboard

SIUDAD TI LAOAG – Umabot iti 15 agingga iti 20 a porsiento ti ngimmatuan dagiti turista ken balikbayan a nagsangpet iti Laoag International Airport.
Segun ken ni Ronald Estavillo, airport manager ti LIA, nadlaw ti iyaadu dagiti nagsangpet ken pimmanaw ditoy probinsia a naglugan iti eroplano iti maudi a lawas ti bulan ti Nobiembre.
Imbatadna nga amin nga agsangpet ken pumanaw nga eroplano iti LIA ket napunpunno.
Mamati isuna a daytoy ket gapu iti kaadu dagiti immay nagbakasion ditoy Ilocos Norte iti panawen ti Paskua nga inawis ni Gob. Imee Marcos ken dagiti dadduma pay nga opisial ti probinsia nangnangruna kadagiti il-ili ken siudad nga agsasaruno ti panagfiestada.
Inlawlawagna nga agtultuloy pay laeng ti kaadu dagiti agsangpet ken pumanpanaw nga eroplano iti erupuerto.
Mainaig iti daytoy, kuna ni Estavillo nga adda dagiti gundaway nga adda dagiti mainayon a “flights” tapno laeng maakomodar amin a pasaheros nangnangruna kadagiti gundaway nga adda dagiti makanselar a “flights”.
Mangnamnama nga agtultuloy ti kaadu dagiti agsangpet nga umay bumisita wenno agpasiar ditoy Ilocos Norte.
PGIN Communications and Media Office