Mangrugi manen a dumteng dagiti bagyo

June 10, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Sakbay man ti amin, kabarangayan, kailian kakayong me ida…adtoy man ti maysa a pagraray-awan tayo. Iti naminsan, sinarungkaran ni Pepita ni Mang Gusting ket nadlaw daytoy a masursuron ti kaanakanna. Dinamagna daytoy no apay ket kuna ti balasang:

Gusting: Apay a nakamisuotka iha.

Pepita: Agdigdigosak ngamin idiay boarding house angkel ket nalipatak nga in-lock ti banyo.

Gusting: Ket ania ti napasamak?

Pepita: Linukatan ketdin tay kakaseraanmi a guapo.

Gusting: Ania…ket ania ti nakitana?

Pepita: Kua… nakatakderak nga agsabsabon a nakasango iti ridaw ti banyo.

Gusting: [katawa] di nakitana ti sibubukel a sanguanam?

Pepita: Wen, a…inlukatna latta ngaminen, ania pay.

Gusting:Timmallikudka koma, a.

Pepita: Ay, di pay ket nakitana ti amin-amin kon, sango ken likuden!

Di wowww, hahahaa.

Bulan ti Hunyon, Kayong Angkuan, kasanu kayo met dita batug yo a langit? Nakarugi kayon a nagaradu kadagiti pagbunobonanyo? Wenno di kay pay nakaraman iti umuna nga arbis ti Mayo a kunada? No ditoy batug mi a langit a ket minalem nga agtodon kas ita a sursuratentayo daytoy a kolum tayo kasta unay angepna ket natural, nakakapote este nakajaket datao. Talaga a narigaten a pataran ti tiempona ita Kayong. Awanen dagiti makuna a pagilasinan idi iti yaay ti nepnep ken kalgawna. No bulanen ti Setiembre, mangrugin nga agluom dagiti dawa a kunada ket apagtapug ti Oktobre, aggapasen wenno aganin dagiti mannalon. Ngem ita, adda pay Desiembre nga agbagbagyon.

Idi agtutubo kami pay laeng, Kakayong ania, no kastoy a tiempo wenno bulanen kapades min ti agraep wenno mangisagsaganan kadagiti kinelleng wenno pagraepan ket makuna a maysa met laeng kadagiti kapatgan a bulan iti mannalon ta itukitna manen ti pagay nga isunto ti pagtaudan ti taraon ti pamilia. Sangsangkamaysa ti pamilia a tumapog iti taltalon ket sangsangamaysa nga agubra. Koma kalian, saan laeng a dagiti OFW wenno asino pay dita ti ibilang ti gobierno wenno datao a mismo ta no awan dagiti mannalon, pangalaan tayo ngarud ti taraon tayo.  Uray dagiti dadduma wenno kaaduan a pagilian maysa nga ipangpangrunada ti agrikultura ngem kadatayo ditoy Pilipinas, kasla naringbawanen ti industrialization. Napaliiwmi pay nga adun kadagiti agricultural land tayo ti pinagbalindan a subdivision.

Nadakamat tayo a dagiti mannalon koma ti pudpudno a banuar ta isuda ti makuna a duri ti pagilian ta isuda ti mangpataud iti taraon dagiti umili. Ngem, no asino pay dagiti rumbeng a mabigbig saan ta kasla nga isuda met ti saan a maikaskaso ngem, talagansa a kasta ti biag ditoy ayan tayo. No asino dagiti nadadagsen ti trabahona, isuda met ti kabassitan ti sueldo a kunada idinto ta dagiti adda iti opisina ket isuda met ti nangato ti sueldona ngem, ala, sapay la koma ta addanto presidente a mangipangpangruna iti agrikultura.

Ulitenmi manen kakailian, dagitoy a mapaspasamak wenno panagbaliw ti paniempo ken ibabara ti lubong ket nagdakkel ti kontribusyon ti tao ngamin, datayo met laeng ti nangrames iti nakaparsuaan, naranggas tayo ngamin ket ditay sinaluadan ti parabor ti Apo.

Ala ngaruden, kasta pay kakayong ta ne, overtime tayo manen… babayoo, tsup tsup muahmuah.