Panagbenga!

February 24, 2018 Opinion Sirmata ken Tagtagainep ni Mang Gusting

Halo, halooo patgen mi a kailian, sadino man a suli ti lubong ti ayan yo a makabasa ditoy kolum tayo, naimbag nga orasyo ken naragsak a paskua kadakayo amin nga awan malabsan. Ket no dakami met ti kas yo damagen a ket kaasi ti Apo, adtoy di pay met la nagurnos dagiti sakami.  Napia latta nga uray kasanu a rigat ti biag a kunada. Agyaman tayo latta iti Apo a Mannakabalin Amin ta masilsilpuan met latta ti biagtayo.

Ngem sakbay man pay ti amin, Kakayong, patalastas man pay tapno maymayat ti buelo tayo a tumapog kadagiti ubra tayo ita a lawas.

Iti panagsinnarak manen da Chairman Gusting ken pare na a Jun iti sango ti store ni Ikit Juana…

Jun: inabak nak manen Chairman Gusting, kas mo la imbaga a nalaadak…

Gust: [laughs] awan imbagbagak a kasta, ah.

Jun: ngem daytoy man met ti saludsodek ket sungbatam. Kitaek man no nalaingka met, chairman.

Gust: wen,ah. Ania dayta? Uray matmaturogak a ket, masungbatak.

Jun: ala man ngarud…apay  a naapgad ti baybay?

Gust: [laughs] sus, naglaka met gayam…

Jun: ammom ti sungbatna?

Gust: ammok, ah…dayta la ketdi. Isu a naapgad ti baybay ta inranta ti Dios tapno saan a malaes dagiti ikan.

Wahahahaahahaa!

Ania’t makunam kayong, saan ketdin nga agpayso? Ala, kidding aside a kunada Kakayong ania, iti agdama, madama ti makuna a Panagbenga Flower Festival ditoy siudad nga ayantayo. Adu manen dagiti nagduduma nga aktibidad nga isu ti ranrantaen wenno dayoen dagit lokal ken gangannaet a turista. Mapatta-patta manen ti kaadu ti sumang-at a turista iti siudad. Makabulan daytoy nga agtibidad wenno festival kakayong no saankayo pay a nakaumay, padasenyo maminsan. Adda met diay makalawas a maiserra ti Session Road iti motorista ta maangay dita ti kunada a session in bloom. Nagduduma dagiti mailako dita a makuna nga indigenous wenno lokal a produkto ngem adda latta met dagiti sarsaramsam. Nagduduma dagiti agtibidad kas iti street dancing competition/parade iti February 24 ken float parade iti February 25.

Ania ti kayat a sawen ti panagbenga kunayo kakayong? Segun iti ammotayo ket daytoy kanu ti bulan ti panagukrad wenno panagbubukar dagiti sabsabong…daytoy ket naadaw ti pagsasao ti Benguet, ngem datayo a patneng nga Ilokano, isu daytoy ti kunatayo a panagukrad ti sabong… panagbukar kuna pay ti dadduma.

Awan ti makunami kadagiti nga agtibidad ta makuna a napintas, makaay-ayo, paggugusto ken makaawis kadagiti turista. Ngem, daytoy met itan ti adatna ta kaaduan kadatayo ti awan disiplinana nangruna no maipapanen ti basura. Ket kalpasan ti ilalabas ti parada, sus maria kusina, dayta metten ti basura…a kayatna a sawen, wara ditoy wara idiay. Pagsayaatanna laengen ta sumarsaruno met iti ipus ti parada dagiti volunters nga agpidut kadagitoy a wara dagiti awanan disiplina a kailian wenno makuna payen a buisita ken uray kadagiti mismo nga agindeg iti siudad, imbes koma a dagiti kailiantayo ditoy siudad ti modelo a makuna wenno mangdillaw kadagiti managiwara a bisita, isudanto pay laeng ti makaun-una. Mamin-anu met laengen nga ibulsam wenno ikargam pay laeng iti bagmo ti nagkaanam ti kendi wenno chitchiria ta sakanto ibasura no makagtengka iti balay yo? Di met husto ti kuna tayo, Kakayong? Kaunting disiplina lang kaibigan, tay kunada ngarud “Clealiness is next to Godliness”!

Ala, kasta nagruden…till we meet again. Nagasat nga aldaw tayo amin nga awan malabsan. Babayoooo, tsuptsup muamuah.