Unay a paniemponan, makapasikor kaka!

February 4, 2017 Opinion Sirmata ken Tagtagainep ni Mang Gusting

Olaaa laaa… hahaha! Kumusta kayon Kailian, Kayong Angkuan. Ikit kuana, musta met ti bisnis tayo. Kitaem a, dika unay agpapautang dita tersinam ta di ket awanton isakadam. Hahaha, adu ket ti managutang dita nga agbalin a kabaw wenno agamnesia. Hahha, wen, a ta adu ti makalipat iti utangna. A no singirem, isuda pay ti adda ganasna nga agluksaw sus maria santisima a kunada. Wenno saan, no utang umayda kenka. Ngem inton adda kuartada, mapanda iti sabali a tersina, nagalas nga aramid ti nuang este tao a pinarsua ti Apo.

Ngem, itarayan tayo man pay la dayta utang este layawen tayo man pay la dayta a topiko ta makapabusor a panunoten dagiti kakasta a tao a kunam la karnero no umayda umutang. Kaka kas kada ikit, uliteg da amin a kutit da tapno ikkam laeng ida wenno pautangam ngem inton agangay, apaendakan tapno malibren tay utangda. Sus ina aya, ngeeeee, kunak a labtawan tayo dayta a topiko ngem dita met latta ti turongenna.

Kayong Angkuan, kumusta ngay, minalem kadi met nga agtodtodon dita ayanyo? Ayna, minalem ditoy batugmi a langit isu a masapul nga agitugot ka latta iti payongmo ta narigaten a pugtuan ti tiempo na. Agasem dayta, panaglukat ti Panagbenga wenno flower festival ditoy ayanmi ditoy siudad dagiti Saleng, sus adda pay aya nabatbati a kayo wenno pinuon ti saleng, Ambit? Awansan hahaha…Wen, Kayong Angkuan, minalem nga agtodo ket idi pormal a malukatan ti flower festival, adda naangay a parada. Ken adda pay street dancing kadagiti adda iti elementarya ket, ania ngay, natudsep sa iti todo dagiti ub-ubbing. Isu a kunami a narigaten a tansiaan ti paniempona, Ikit Kuana. Saanen a kas idi a no kastoy a bulan awan a pulos mauray mo a lua ti langit este todona ngem ita, ania ngayen? Bigla lattan nga agarbis wenno agtodo. Nupay kasta, nasayaat met ketdi tapno mabisibisan ti mawaw nga Ina Daga. Mabasa met ti makuna a natikagan a rengngat eheeeelk, sabali man a kunakon ta isem mo Kayong Angkuan. Hahaha, ania ti kunam, nagrengngaten tay alog mo? Ah, ah, sabali man nga alog ta ibagbagamsan, a…hahaha, ammok, ah…siak pay ti kunam. Siak pay, ako pa, hahaha.

Wen, kailian, gapu iti Global warming nagbaliw ti panawen. Climate change kunada. Ayna, apowww, addaytaka manen a climate change ken global warming. Adda man malagip tayon nga isyu idi. Tay kunada a nagmulada iti puon ti kayo idi arinunos ti todtodona ket umayen ti kalgaw, sus santa maria a babassit, kasano koma pay nga agbiag dagita a similia no umay metten ti kalgaw… ammomi, ah, nagkuartaan yo manen dayta a proyekto ti gobierno. Nagdakkel ti nailatang dita a pondo ngem ayanna ngay ita. Awan pay makitam nga uray la koma ulila a puon ti kayo a nagbiag kadagiti naituding a mamulaan wenno ma-reforest a kunada. Pweeee, style yo bulok! Makitam Kayong, dumikar manen ti altra presyon ta agburek manen ti ruyal blood ko no malagipko dagiti adu nga anomalya kadagiti nagduduma a sanga ti gobierno. Idinto ta adda dita ni Kayong Angkuan a dandani di pay malanitanen ti subilna.

Daytoy man ketdi ti inkam i-share a nabasami iti maysa a babasaen nga iluoko, Kayong Angkuan. Ania ti usar ti daan kas koma iti panty hose? Oh, ania ading Melai…saanka nga agisem dita ta pudno daytoy innak i-share kenka. Sabali la a talaga ti managbasa, hahaha. Ti daan a panty hose mabalin mo a pagkargaan kadagiti tedtedda a sabon. Babaen itoy mausarmo uray dagiti kababassitanen a tipping ti sabon, ania, mamati ka? Maikadua, pagsagatan iti daan a pintura; iti kasta, maikkat dagiti rugit ken timmangken a pintura a mabalin a mangdadael iti trabahom. Ken maudi, Kayong Angkuan, yudaodmo iti nabiit pay a nalimpia wenno na-shine a sapatosmo, nasilsileng pay no kua ti sapatos. Ania, mamati ka Kayong…ala, no saanka a mamati, padasem ta makitam ti gidiatna. Hahha…bueno, Kakailian, agingga manen ditoy ti intay panagiinnistorya ta inkam man pay kumape ken Apo Editor Thom dita nay ayan dagiti barkada a barbero, babayooo, tsuptsup muahmuah. Adios mi Amor!