3 menor de edad, isa pa, nanloob sa Baguio

August 27, 2017 Headlines

Halos P200,000 gamit, tinangay
LUNGSOD NG BAGUIO –  Nadakip ang dalawang  menor de edad habang pinaghahanap ang isa pa at kasama nilang 24 anyos na lalaki matapos na nilooban ng mga ito ang isang kwarto sa tatlong palapag na residential house sa Upper Crystal Cave, Bakakeng Central, lungsod na ito, dakong 9:30 ng gabi noong Agosto 22, 2017.
Kinilala ang isang suspek na si Benjamin Gazmen Tulepa Jr., 24 anyos, na kasama ng tatlong menor de edad.
Ayon sa imbestigasyon, napag-alaman na sinira ng mga suspek ang metal padlock at door knob ng main door ng nasabing bahay at pinasok ang kuwarto ng biktima na si Antonina Salud Fernandez, 39 anyos, single, call center agent at border ng nasabing bahay.
Tinangay ng mga suspek ang mga gamit ng biktima na: tatlong units ng Casio at G-Shock wrist watch na nagkakahalaga ng P19,500; Rado wrist watch, P50,000; Swatch wrist watch, P7,000; Kenneth Cole wrist watch, P5,000; Silver wrist watch, P5,000; Lenovo laptop, P40,000; Sony Action camera, P19,500; Fokuda 32 inches TV, P7,000; terabyte external drive, P4,000; 500 gigabyte external drive, P3,000; Apple IPOD 4th Gen 32 gigabyte, P2,500; electric stove, P2,000; TV Plus, P1,500; dalawang DC rubber shoes, P12,000; Dexter rubber shoes, P500; bluetooth speaker, P500; unused assorted shirts, P3,000; gray Nike bag, P1,500; dalawang rechargeable lights, P200; at cash na P3,000.
Sa panayam kay Virgina Paulino, 36 anyos, sa katabing kuwarto ng biktima, inihayag nito na sa pagitan ng 11am hanggang 12:30pm ng nasabing araw, nakita niya ang apat na kalalakihan, umuupa rin sa isa pang kuwarto, at kahina-hinala ang kanilang mga galaw na sumisilip sa bintana ng kuwarto ng biktima.
Ang dalawang suspek ay lumabas at nag-umpisang magtapon ng mga empty boxes ng sapatos sa may gumamela plants kaharap ng kaniyang tindahan, at dito napag-alaman na gamit ang mga ito ng biktima.
Nahuli ang dalawang menor de edad at dinala sa DSWD, samantalang si Tulepa Jr. at isa pang menor de edad ay nakatakas.
Matatandaan na noong nakaraang taon ay inihain ni House Speaker Pantaleon Alvarez ang isang panukala upang pababain ang edad ng mga batang maaaring ikulong. Bago matapos ang 2016 ay anim na panukala ang isinusulong sa Kongreso upang amyendahan ang Republic Act 9344 o Juvenile Justice and Welfare Act (JJWA) upang ibaba sa 9anyos ang minimum age ng criminal liability mula sa 15anyos.
Ang mga panukalang ito ay umani ng batikos at pagkondena mula sa iba’t ibang grupo sa buong bansa hanggang noong unang quarter ngayong taon.Iginiit ng Department of Social Welfare and Development na ang pagpapababa sa edad ng may criminal liability ay hindi sagot upang mapababa ang mga nagaganap na krimen. ABN