Barangay kapitan iti Bauang, napapatay

August 7, 2018 Headlines

CAMP BGEN OSCAR M FLORENDO – Napalpaltugan inggana natay ti chairman ti Barangay Parian Oeste iti Bauang, La Union idi agsapa ti Agosto 1, 2018.
Nabigbig ti biktima a ni Alejo Calica Abuan Jr., a pinalpaltugan ti dua a saan pay a nabigbig a lallaki, 8:30 ti agsapa iti Barangay Nagrebcan, Bauang, La Union.
Segun kenni Police Chief Superintendent Romulo E. Sapitula, regional director ti Police Regional Office-1 (PRO1), ni Abuan ket nakalugan iti motorsiklo idi napasamak ti pammaltog.
Maibasar iti report, ni Abuan ket nakalista kas maysa a drug surrenderee iti nakuna a munisipalidad.
Narekober ti SOCO team manipud Regional Crime Laboratory Office 1 ti lima nga basyo ti bala ti kalibre.45 ken dua a bala ti kalibre.45.
Mapapati nga intaray dagiti suspek ti maroon nga sling bag ti biktima a naglaon iti kuarta ken cell phones.
Nagbilin ni PSSupt. Ricardo G. Layug Jr., provincial director ti La Union, kadagiti kabangibang nga estasion ti pulis tapno mangisayangkat ti dragnet operations iti posible a panangkemmeg kadagiti suspek.
Inbilin pay ni Sapitula a masukisok a nalaing ti insidente ken maigtan dagiti operasyon ti kapulisan iti rehion tapno maresolba a dagus ti imbestigasyon ti pannakapapatay ni Abuan. ABN