Kaso ti kamuras iti rehion 1 ngimmato – DOH

April 14, 2019 Headlines

SIUDAD TI SAN FERNANDO, La Union – Impakaammo ti Department of Health-Region 1 iti panagngato iti kaskaso ti kamuras (measles) sadiay Ilocos Region.

Iti nabiit nga naangay a first quarter miting ti Regional Disaster Risk Reduction Management Council (RDRRMC), kinuna ni Dr. Rosario Pamintuan, head ti Regional Epidemiology and Surveillance Unit iti DOH Region 1, nga manipud Enero1, 2019 agingga Marso 23, 2019, ket addaan 1,160 kaso ti measles iti nairecord mairaman iti 28 nga pannakatay.

Iti kabuklan nga kaskaso, 941 ditoy ket nairekord sadiay Pangasinan; 158 iti La Union; 46 iti Ilocos Sur ken15 sadiay Ilocos Norte.

Iti 28 nga natay ket manipud amin sadiay Pangasinan. “Naaddaan 1,364 porsiento nga panagngato manipud kapareho nga period idi napalabas a tawen,” kuna ni Pamintuan.

Nu ikumpara daytoy iti kaskaso nga naireport iti pareho nga periodo iti napalabas nga tawen ket 85 kaso laeng iti nailista, 32 ditoy ket manipud Pangasinan; La Union – 35; Ilocos Sur – 9; ken Ilocos Norte 9; addaan 6 nga natay, amin manipud Pangasinan.

Tapnu makontrol iti panagngato iti kaskaso ti kamuras sadiay Rehion 1, kinuna ni Pamintuan nga di agpatingga nga ipatpatungpal iti departamento ti pinaregta nga panangsiput iti kamuras nga addaan tulong manipud health centers dagiti local government units nga sinaruno iti massive vaccination.

“Kasapulan mi iti kooperasion ti amin nga ahensia ti gobyerno ken stakeholders tapnu maiwaras iti impormasion nga mangallukoy kadagiti nagannak nga awitenda dagiti annakda iti health centers tapnu mabakunaan iti antimeasles,” kinuna ni Pamintuan.

Amin nga ubbing nga edad innem a bulan agingga 59 nga bulan ket nasken nga makaawat iti free anti-measles vaccination para iti kinatalged ti salun-atda,” innayon na.

Kinunana nga iti kamuras ket highly contagious respiratory disease nga gapu iti maysa nga virus ngem mabalin nga malappedan nu mabakunaan dagiti ubbing.

Impakaammo ni Pamintuan nga iti measles ket maysa nga makaakar nga sakit nga mabalin nga maiyakar manipud maysa nga tao iti maysa pay nga tao baet ti panagbang-es, panaguyek, ken asideg nga panakilangen.

Dagiti sintomas iti nasao nga sakit ket uyek, panagbuteg, nalabaga nga mata/conjunctivitis, gurigor, panaglabbaga ti kudil nga agbayag iti nasurok iti tallo nga aldaw.

PIA-1/PMCJr./ABN