P1.2-B Pangasinan-Zambales road, kabilang sa prayoridad ng NEDA

November 11, 2017 Provincial

DAGUPAN CITY – Isinama ng National Economic Development Authority (NEDA) ang Pangasinan-Zambales road bilang isa sa mga prayoridad na proyekto na isasakatuparan ng Department of Public Works and Highways (DPWH) mula 2017 hanggang 2022.
Pinuri ni Pangasinan Second District Rep. Leopoldo Bataoil ang hakbang na isama ang kaniyang pet project nang dumalo siya sa Economic Zone Summit ng Pangasinan at La Union na inisponsoran ng Philippine Economic Zone Authority (PEZA) noong Nobyembre 8, 2017 sa CSI Stadia, Dagupan City.
Sa summit na pinasimulan ni PEZA Director General Charito Plaza, inilista ng NEDA regional office ang mga proyektong nakalinya para sa Pangasinan at La Union kabilang ang Pangasinan-Zambales road na naunang ipinanukala ni Bataoil sa DPWH. Ang ipinanukalang kalsada ay hahantong sa malawak na sukat ng mga lupa sa pagitan ng dalawang lalawigan.
Personal na pinangalanan ni Bataoil ang 54-kilometer Pangasinan-Zambales highway bilang “Kalikasan Road” upang mabuksan ang ibang lugar para sa eco-tourism development at maaaring maging lokasyon ng panibagong economic zone para sa Pangasinan kung saan maaaring maipatayo ang eco-tourism industries.
Daang ektarya sa lugar ng Pangasinan ay maaaring mapili bilang economic zones, ani Bataoil.
Nabigyan ng budget na P1.2 billion ng NEDA, ang panukalang Kalikasan Road na dating logging area kung saan posibleng maging eco-tourism at i-maximize sa bidding upang magdala ng maraming turista sa Southwestern Pangsinan, simula sa Mangatarem.
Ani Bataoil, ang 54-kilometer Kalikasan Road ay halos kalahati ng Pangasinan at ang natitira ay sa Zambales.
Dagdag niya pa na sa Pangasinan-Zambales road, ang travel time sa pagitan ng dalawang probinsiya ay mababawasan at magiging isa’t kalahating oras na lamang.
Inaasahan ni Bataoil na ang proyekto ay magsimula bago magtapos ang kaniyang ikatlo at huling termino sa 2019 bilang congressman ng second district ng Pangasinan. PNA / ABN