P9-M ‘cleanest, greenest, safest’ projects, inawat ti LGUs ti La Union

June 23, 2018 Headlines

SIUDAD TI SAN FERNADO, LA UNION – Pito a local government units ken tallo nga inland water destinations iti probinsia ti nakaala ti P9milion a gatad ti proyekto iti agri-tourism ken para iti aglawlaw kalapasan a nagun-od dagitoy ti cleanest, safest, and greenest award.
Naawat dagiti lokal a gobierno dagiti gungunada iti awarding ceremony iti Diego Silang Hall, Provincial Capitol ditoy siudad idi Hunio 20, 2018 kagiddan ti panangrambak iti environment month nga addaan tema a “beat plastic pollution” nga insayangkat ti Office of the Provincial Government-environment and natural resources division.
Naipaay dagiti pammigbig kalpasan ti pammaneknek ti composite team idi 2017, maibasar kadagiti sumagmamano a criteria iti pakabuklan a kinadalus ti munisipalidad, urban space greening, environmental management system, ken pannakipagkaykaysa dagiti umili.
Pakairamanan dagiti kinitada ti urnos ken talna a pakaibilangan ti crime statistics ken panangipatungpal dagiti prevention programs iti krimen, droga, ken aksidente iti kalsada.
Iti 1st to 3rd class municipality category, inyawid ti Agoo ti umuna a gunguna nga P1.5milion a gatad ti proyekto; maikadua ti Naguilian a nakaala ti P1milion; ken maikatlo ti Bacnotan a nakaawat iti P500,000.
Para iti 4th to 5th class category, nangabak ti San Gabriel iti P1milion; maikadua ti Caba, P750,000; ken Santol, P500,000.
Naited ti maysa nga special award ken citation iti City of San Fernando, La Union. Inawat ni Mayor Hermenegildo “Dong” Gualberto, a kadwa dagiti staff ti City Environment Natural Resources Office, ti P1.5milion a mausar iti nagduduma nga environment ken agri-tourism related projects.
Kabayatanna, iti kategorya ti cleanest inland bodies of water ket nangabak iti umuna a puesto ti Tapuakan River iti Pugo, P1milion, maikadua ti Tangadan falls iti San Gabriel, P750,000; ken maikatlo ti Bagulin River iti Bagulin, P500,000 a gatad ti proyekto.
Ti awarding ceremony ket inatendaran ni Assistant Secretary Joselin Marcus E. Fragada, field operations-Luzon, a nagserbi kas guest of honor ken pannakabagi ni DENR Secretary Roy A. Cimatu.
Malaksid kenni Fragada, dimmar-ay dagiti lokal nga opisial ti probinsia nga idadauloan ni Vice Gov. Aureo Agusto Nisce, kas pannakabagi ni Gov. Emmanuel Francisco Ortega III; Director Reynulfo Juan, DENR-region 1; National Economic and Development Authority (NEDA) Assistant Regional Director Donald James Gawe; ken DENR-EMB Regional Director Ma. Victoria Abrera.
Ti probinsia ti La Union ket addan ti pakabuklan nga 20 LGUs (maysa a siudad ken 19 nga munisipalidad). E.BELEO / ABN