Public consultation, di kailangan sa SM Sky Ranch project – mayor

October 8, 2018 Metro BLISTT

Binigyang-diin ni Mayor Mauricio G. Domogan na hindi na kailangan ang public consultation sa ipinapatayong Sky Ranch project ng SM Baguio bago ito mabigyan ng permit ng lokal na pamahalaan basta sumunod ang mall sa lahat ng requirements.
Ibinalik nang hindi napirmahan ng mayor sa konseho ng lungsod ang Resolution No. 303, series of 2018 na humihimok sa SM Baguio at Sky Ranch Amusement Park Baguio na magsagawa ng public consultations para sa “social acceptability” ng ipinapatayong amusement park at upang kumuha ng endorsement mula sa Sangguniang Panlungsod bilang pagsunod sa Local Government Code at iba pang batas.
“The amusement park is within a private property. It is respectfully submitted that the public consultation and endorsement from the City Council is not required before a permit can be issued so long as they had complied with all the requirements,” giit ni Domogan.
Nauna rito ay inimbitahan ng konseho sina City Engineer Edgar Victorio Olpindo, City Building Official Nazita F. Bañez, City Environment and Parks Management Officer Cordelia Lacsamana, City Planning and Development Officer Evelyn G. Cayat, Baguio City Police Office (BCPO) Traffic Management branch head Chief Inspector Oliver Panabang, SM City Baguio mall manager Rona Vida Correa at SM City Baguio Sky Ranch project manager o ang kinatawan nito tungkol sa ilang alalahanin sa naturang ipinapatayong amusement park.
Sa naganap na deliberasyon ay nagkasundo ang konseho na kailangang himukin ang SM Baguio at Sky Ranch Amusement Baguio na magsagawa ng public consultations at kumuha ng endorsement mula sa Sangguniang Panlungsod.
Ngunit iginiit ni Domogan na ang operasyon ng Sky Ranch amusement and recreation facility ay magiging dagdag na tourist attraction sa lungsod lalo pa at walang mga amusement and recreational center kung saan ang mga residente at bisita ay parehong makakapaglibang. BAGUIO PIO / ABN