4 A SIUDAD, ILI TI PANGASINAN PANGSUBOKAN ITI ‘REGISTER ANYWHERE PROGRAM’ TI COMELEC

January 27, 2024 Headlines

LINGAYEN, Pangasinan

Agserbi a kas pangsubokan a lugar dagiti uppat a siudad ken kapitolio nga ili ti Pangasinan nga opisina ti Commission on Elections (Comelec) para iti intero a pagilian a pannakaipatungpal iti Register Anywhere Program (RAP), a mangpalubos kadagiti botante manipud dadduma a lugar nga
agparehistro.

Imbaga ni ComelecPangasinan election supervisor Atty. Marino Salas, iti maysa nga interbiu idi Mierkoles nga dagiti opisina ti Comelec iti siudad ti Dagupan, Urdaneta, San Carlos ken Alaminos, ken iti Lingayen, ti kapitolio nga ili ti Pangsinan ket mangipaay iti RAP manipud Pebrero 12 agingga Agosto 31 ita a tawen.

“Maaddaanda iti dua a makina kadagiti opisinada, maysa para iti ordinario a panagrehistro ken iti maysa ket para iti RAP,” kinunana. Malaksid iti baro a panagrehistro ti botante, dagiti lugar ti RAP ket umawat iti pannakayakar iti panagrehistro, pannakayakar iti panagrehistro manipud ballasiw-taaw agingga lokal, panangkorehir kadagiti entry wenno panangbalballiw ti kasasaad, ken panangreaktibo.

“Alaanmi iti biometrics dagiti agparehistro yantangay addaantayo iti kapasidad wenno teknolohia nga agproseso iti tunggal nakarehsitro a botante sadinoman ditoy Pilipinas. Makita tayo iti database no adda iti doble a panagrehistro yantangay ta mabalintayo nga idilig iti biometrics manipud iti aplikasion ken ipakaammona kadatayo no adda iti doble wenno adu a nagparehistro,”
kinuna ni Salas iti pagsasao a Tagalog.

Iti panagsubli ti pangrehistro dagiti botante ket mangrugi inton Pebrero 12 ken agpatingga iti Setiembre 30 ita a tawen maitunos iti midterm national ken local elections ti 2025. Imbaga ni Salas a puntiriada nga iparehistro iti agarup 30,000 agingga 50,000 baro a botante iti probinsia manipud ordinario a panagrehistro ken RAP kabayatan iti daytoy a paset ti panagrehistro dagiti botante.

Makita iti datos ti Comelec nga adda agarup 2.1 milion a rehistrado a botante iti probinsia
para iti Barangay ken Sangguniang Kabataan Elections idi Disiembre 2023. Imbaga ni Salas nga iti
Comelec ket maaddaan iti satellite wenno offsite registration sites kadagiti barangay hall, mall, pagadalan ken uray kadagiti pasilidad ti pagbaludan tapno maikkan ti tunggal maysa iti gundaway
nga usarenda ti kalinteganda nga agbutos.

Imbagana a dagiti opisina ti Comelec iti probinsia ket silulukat iti nagbaetan ti 8 ti bigat agingga 5 ti malem manipud Lunes agingga Sabado, malaksid iti las-ud ti Semana Santa, tapno serbisioan
dagiti agparehistro. Indagdagna kadagiti umili a saanda nga aguray agingga naituding a tiempo sakbayda a mapan kadagiti opisina ti Comelec.

(HA-PNA Ilocos/PMCJr.-ABN)