40% PANAGNGATO DAGITI KASO TI NAIREKORD ITI REGION 1, 1 KASO TI PERTUSSIS NAKUMPIRMA

March 29, 2024 Headlines

ALAMINOS CITY, Pangasinan

Ngimmato dagiti kaso ti kamuras iti 40 porsiento iti Rehion 1 agingga ita ken nairekord ti rehion iti maysa a
nakumpirma a kaso ti pertussis (whooping cough), imbaga ti panguluen ti Department of Health Center for Health
Development in Ilocos Region (DOH-CHD-1). Imbaga ni DOH-CHD-1 medical officer Dr. Rheuel Bobis nga dagiti kaso ti kamuras iti rehion manipud Enero 1 agingga Marso 9 ita a tawen ket dimmanon iti 3, ngimmato manipud 27 kaskaso iti isu met laeng a periodo idi napan a tawen.

“Pinapigsami iti aktibidad ti panagbakuna. Umadu dagiti kaso no nababa ti saklawen ti panagbakuna ken dagiti bakuna laeng ti makalapped dayta,” kinunana iti maysa nga interbiu idi Biernes. Imbaga ni Bobis a dagiti bakuna para kamuras, rubella, pertussis ken dadduma pay a sakit a malapdan ti bakuna ket nakasagana para kadagiti ubbing a libre kadagiti ospital ti gobierno ken health centers. “Dati nga ar-aramidenda iti gagangay a panagbakuna tunggal Mierkoles kadagiti health center ngem inaldaw ng ar-aramidenda itan dayat tapno maakomodarda iti populasion,”

kinunana. Nairekord ti Pangasinan ken La Union iti kaaduan a bilang dagiti kaso ti kamuras a 13 tunggal maysa, sinaruno iti pito iti Ilocos Sur, ken lima iti Ilocos Norte. Imbaga ni Bobis a dagiti sintomas ti kamuras ket karaman
iti gurigor, panagsupotsupot, conjunctivitis ken uyek, ken iti maysa a pasiente ket kasapulan a maagasan iti maysa nga ospital. Imbagana nga adda maysa a nakumpirma a kaso ti pertussis iti Pangasinan agingga Marso 9 ita a tawen, ngem immimbag metten iti pasiente ken nakaruaren iti ospital idi Marso 12.

Kinunana pay nga ti pertussis, a mabalin a mayakar babaen dagiti tedted ti panaganges (respiratory droplets), ket nakaro a makaakar ken addaan ti nangato a mortalidad yantangay a mabalin a pakaigapuan ti nakaro a pulmonia nangruna kadagiti ubbung, ngme mabalin a malappedan babaen ti bakuna. “Maited daytoy iti tallo a doses kadagiti maladaga iti innem, sangapulo ken 14 a lawasda,” kinunana, nga imbagana nga mabalin met a mausar dagiti nataengan dagiti booster shot. Karaman kadagiti sintomas iti panaguyek nga adda agpukpukkaw nga uni nga agpaut iti nasurok a dua a lawas a kuyugen iti panagsarua gapu iti nalabes ken napigsa a panaguyek. Masapul a maagasan dagiti pasiente iti maysa nga ospital.

(HA-PNA Ilocos/PMCJr.-ABN)