63 tour operators, nagpasiar iti LU

March 17, 2018 Headlines

BAUANG, LA UNION – Nagpasiar ti 63 operators a kameng ti Philippine Tour Operators Association (Philtoa) kadagiti nagduduma nga lugar nga ipagpanpanakkel ti probinsia manipud Marso 15 inggana 17, 2018.
Daytoy ket babaen iti panangawis ti probinsial a gobierno ti La Union (PGLU) nga idadauloan ni Gov. Emmanuel Francisco “Pacoy” R. Ortega III kas paset ti estratehia tapno magun-od ti sirmata nga agbalin ti La Union kas “heart of Agri-Tourism in Northern Luzon by 2025”.
Dagiti operators a naggapu iti Cebu, Manila ken Bulacan ket indaulo met ni Cesar Cruz, presidente ti Philtoa.
“There is a need of new tourism packages for our tourists especially now that summer is fast approaching and tourists flock to our country,” kuna ti maysa nga operator manipud Bulacan.
Segun kenni information officer Adamor Dagang, mangidadaulo iti Provincial Information and Tourism Office (PITO), ti tour a naisagana para kadagiti kameng ti Philtoa ket pakaibilangan ti Nuestra Señora Virgen Del Mar Cautiva iti Sto. Tomas, Basilica Minore ti Our Lady of Charity iti Agoo, Pugo Adventure, Pindangan Ruins iti Brgy. Parian, Poro Point Lighthouse, Baywalk, Halo-Halo de Iloko Balay iti Brgy. II, San Fernando City, Macho Temple iti Brgy. I, San Fernando City idi Marso 15.
Kabayatan a ditoy Bauang, binisita dagiti turista ti Urayong Grape Farms ken Lomboy’s Grapes Winery, Sts. Peter and Paul Church a maysa kadagiti kaunaan a simbaan iti pagilian, ken ti “balikbayan” a San Pedro Bell a natawenanen iti 115.
Naisayangkat ti Governor’s Night iti Thunderbird Resorts. Ditoy nga inparang ni Gobernador Pacoy ti Agri-Tourism development plan ti probinsia, kangrunaan ti tourism circuit packages. Napirmaan ti Memorandum of Understanding wenno Pledge of Support iti marketing ti Agri-Tourism circuit packages ti probinsia.
Iti maikadua nga aldaw, Marso 16, nagpasiar dagiti turista iti La Union Provincial Capitol, La Union Agri-Tourism Center, ken sericulture and ape culture industry immersion iti DMMMSU-NLUC. Binisitada ti River Farm Seafood Restaurant iti Baroro, Bacnotan, La Union; USAFIL- NL, Stone Hand Art Gallery, Namacpacan Church ken Baluarte Tower, ken Pebble Beach, masarakan amin iti Luna; ken iti De Castro ken Bangar loomweaving.
Kas kangrunaan nga aktibidad, inisponsoran ti Department of Tourism (DOT) ti maysa a rabii a business to business activity iti Thunderbird Resorts.
Iti maikatlo nga aldaw, tallo ti pagpilian a mapasiar: surfing iti San Juan, pottery making iti Taboc ken boodle fight iti Camp Avenue, San Juan, wenno ti Tangadan Waterfalls ken balsa-kay iti San Gabriel.
Nagsubli iti Manila dagiti bisita idi malem ti Marso 17.
Ti Philippine Tour Operators Association (Philtoa) Inc. ket maysa nga organisasion dagiti tour operators ken kaaliado a miembro a mangitantandudo iti responsable a turismo. Maysa daytoy a non-stock ken non-profit organization a nangrugi idi Hunio 12, 1986. Dagiti miembro ket pakairamanan ti travel agencies, hotel, resorts, transportation companies, handicraft stores, ken sabali pay a tourism-oriented establishments ken gunglo. BAUANG PIO / ABN