Ania’t kunayo? Nabagyo dagiti balota, anak ti buwaya!

April 7, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Ngem sakbayna, kakayong, adtoy man pay ti ababa nga inkam pangray-aw kadakayo tapno makerrasan ti dudukot tayo a kunada. Nagtagtagainep ni Mang Gusting ket kampay idi nagsarakda ken San Pedro idiay ruangan ti langit. Kastoy ti eksena…

San Pedro: Gusting, pastrekenka ditoy langit no ammom ti nagan ti Dios.

Gusting: Harold, Apo.

San Pedro: Nangal-alaam iti dayta, Gusting?

Guszting: Iti kararag Apo San Pedro.

San Pedro: Ania a kararag?

Gusting: Denggem Apo…”Our father, who art in Heaven, HAROLD by thy name”

San Pedro: Ania!

Gusting: Saan a husto ti kunak, Apo?

Hahahahaah, ania, nakapidot kayo met laeng iti adal wenno leksion, kakayongko ida ken nagrungiit kayo met laeng?

Bueno kakayong, kailian, agkatawa dagiti mayat, ah… opsss, dikay agmurareg ah dakes ti kanayon a nakasiddunget. Kunada ngarud laughter is the best medicine. Isu nga agkatawa wenno umisem kayo nga uray agsasamusam dagiti intay paspasaren a parikut.

Itay napalabas nga Abril 2, narugyan ti pannaka-recount dagiti botos dagiti dua a kandidato iti kina-bise presidente a da Leni Robredo ken sigud a senador Bongbong Marcos manipud kadagiti napili a lugar. Ngem ania a nagkas-ang kakayong ta nabasa dagiti immuna a balota a bilangenda koma. Kasanu a mabasa ket kunada a naka-safety dagitoy ken nakakabil iti kahon? Tanda kadi manen daytoy nga uray ita ket adda latta manen sinnaur? Apay kadi a saan a maikkat ti tao ti kastoy nga aramid?

Seguro kailian, no mabalin a saurem pay ni San Pedro, aramidem. Ibagam kenkuana nga awan basolmo. Makapasuron a makapaluksaw kailian, kakayongmi ida, mabutengda kadi a maamuan a talaga a nagkusit ti grupo ni Leny Roberedo idi election 2016? Hay naku, anak ti buwaya kayo. Ad-adda manen kailian a nabuisit ti umili iti kasta nga aramid. Kunada ngarud, magpakatotoo ka. Isu nga adu latta dagiti saan a mangbigbig ken Bise President Leny Robredo kas pudpudno a bise presidente gapu iti maatap a kalokuan nga inaramid da iti kallabes a national elections. Annak ti buwaya kayo…

Mapaspasungadan ti barangay election inton bulan ti Mayo kailian. kakayong mi ida. Koma, sayaatenyon ti agpili iti maisukat kadagiti over staying a barangay officials tayo. Ta oras a nagbiddut tayo manen, iti oras a naala tayo manen iti kumkumpare, nalpas manen. Datayo manen ti sumabeng iti no manu a tawen. Adu ti naragsakan, adu met ti naladingitan iti pannakatuloy ti barangay elections. Dagiti maragsakan, isu dagiti agngayngayangay a kumandidato, ket dagiti met masmasnaayan isu dagiti dina pay kayat ti pumanaw iti tugawda nga uray agturposen ti terminoda. Kasta met kadagiti namnamaenna a maabaken. Hay naku a talaga, biag ni Pinoy. Bay-an tayo a sumukat koma met dagiti talaga a napudno nga agserbi a saan laeng a ti awatenna nga honorarium ti sagsagangenna tunggal agtapus ti bulan. Adu ti kabarangayantayo a mayat nga agserbi ngem ti rigatna, ulaw tayo no maminsan a bumarangay ta saantayo nga arisiten a naimbag ti intay ibobotos, kalpasanna, inton nakatugawdan ket awan met ar-aramidenda…intay ida tabtabbaawan ti liklikudanda. Ano ba yan!

Ala ngaruden, kasta pay kakayong ta ne, overtime tayo manen, kasta pay ket ne…nakaadu tayo manen. Babayoo, tsup tsup muahmuah.