Ania’t makunam, Kayong?
Ania’t makunam Kayong, no kuma ta nagkandidato ka koma met idi a kas Diputado dita distrito yo, no nangabak ka, mabalin mo koma met ti makibalubal para iti Speakership. Apowww aya, uray dayta a posision pagbabalubalan dagiti mararaem wenno honorable a tongrisman este Kongresman.
Ania la ketdin nga agpayso ti pulitika aya, ngem ala, urayen tayo no ania ti pagbanagan na. Papagayam, diyo liwayan a denggen ti tuloy ti drama tayo nga padaanan no asino ti agbalin nga speaker of the house a kunada.
Iti napalabas a kolum tayo, parikut latta ti intay tinaltalantan maipanggep iti isyu idiay reed bank wenno ti panangdungpar ti barko ti Tsina iti lugan dagiti pinoy a mangngalap. Adda bassit nga isyu a kuna da ngem dagiti sugsog, kayat da a padakkelen ken panggapuan sa payen ti Pilipinas a manggubat iti Tsina ti kayat da.
Ania’t makunam,Kayong Angkuan? Saan a panangtagibassit iti kabaelan ti armada ti pagilian, Kayong ngem idi sinakup dagiti rebelde idiay Mindanao ti Marawi City, adu payen a rigat da. Adu pay laeng ti naipatli a biag sakbay a narebbek da dagitoy.
Tsina la ketdin ti kalabanem, amangan no maysa laeng a bomba a nuclear ket awanen. Ita, Kayong Angkuan, saan a maib-ibusan iti parikut ti agdama nga administrasyon wenno gobierno tayo. Adu latta ti isyu, ngem natural san dayta iti uray asino nga agturay.
Adu latta dagiti maibakal kenkuana a parikut wenno isyu. Ania ngay ti makunam, Kayong Angkuan kadagiti kabarbaro a nabotosan nga opisyal manipud senado agpapaba? Addan makalawas da a nagtugaw.
Kadagiti gobernador, mayores adda diay makuna a 100 days nga umuna a nagapuananda. Kuna da, iti umuna kanu a 100 days na, makitamon ti inalatna. Addan dagus pakakitaan no ania met dagiti gasat nga inna iyawat para iti pagimbagan ti lugar a masakupan na wenno kadagiti kailian na.
Ditan a makita dagiti makuna a prioridad na nga aramiden nangruna dagiti kabarbaro a tugaw wenno nangsukat iti sigud nga agturay wenno mangidaulo. Nangruna kadagiti kabarbaro a tapug a nangibalat kadagiti ir-iran a kunada.
Adu ket ti kasta a napasamak iti pagilian tayo. Adu dagiti nababtuog a sigud a king pin iti nasao a lugar. Dagiti nagturturay iti manu a dekada ngem awan kanu met naar-aramidan da. Ti ketdi nakita dagiti kailian da ket isu ti panagsukat-sukat dagiti luxury cars da wenno pannakaadda iti lugan ti sibubukel a pamilia. Inayan pay a kunada.
Ania’t makunam, Kayong Angkuan? Naimbag a no saan a kasta ni Mayor Torcuato dita iliyo. Damag ko ket isu kanu ti nangsukat iti nabayagen a ni Mayor Tiktikrubong a di makaaklon nga inabak ti maysa laeng a nanumo nga agtartaraken sa iti Karnero ken kalding. Kuna na a sinaurda kano.
Nadagdag bawas iti elleks mi Kayong Angkuan. Kasanu a makapagkusit ngata ti agdadamo? Ania’t makunam, adda ngata kabaelanna? Ti kunam ketdi, talaga a saanen a kayat dagiti kailian da. Nagadu ketdin a rason. Sinaur nga—adu la amin.
Three words for a better society
July 8, 2019