Ano ba talaga, kuya?

September 22, 2019 Sirmata ken Tagtagainep ni Mang Gusting

Bayat a masursurat toy kolum tayo, banat latta ti bayakabak na no labsem ti agsao. Talaga a di pulos makamulagat ti pusa ket no saan tayo nga agriri. Nasuroken a tallo lawas a kastoy na isu a nalammin latta. Kaasi dagitay awan human blanket na ta ag-question mark da a maturog piman. Ngem kasanun dagidiay dua, tallo, uppat, wenno lima ti human blanket na, di awanen parikut da? Hahahaha di wow..!

Ayna kailian aya, kabarangayan a di maawawatan ti rikna, kapanunotan ken kayat dagiti umili nangruna ditoy siudad ti Baguio.

Apay a nakuna tayo ti kastoy kailian? Segun kadagiti naalimadamad tayo a sayangguseng dagiti marabutit este para paliiw tayo a mangmangkik, saan a maawatan ti kayat dagiti umili maipapan iti pannakaiserra ti kagudua ti session road tunggal Domingo.

Adu manen ti nakisawsaw, kisio naiserra lattan gapu ta isu’t bilin ni Apo Mayor. Di kanu nagna iti konseho ti siudad. Ngem kalkala pay a nailukat, manu a domingon. Dagiti dadduma, kayat da malukatan manen. Dagiti met dadduma, mataginayon pay ket koman kas kadagiti dadduma a dadakkel a siudad iti sabali a nasion.

Adda diay nailatang a kangrunaan a kalsada iti siudad a di mabalin a pagnaan wenno sumrekan ti ania man a klase ti lugan tapno nawaya ken awan sawsawir dagiti tattao a magna wenno agpasyar tunggal family day a kuna da, nga uray tumanaray dagidiay annak ken appo da, iti nasao a lugar awan pagamamakan da nga amangan no madalapus ti lugan.

No dakami ti inkayo damagen ti kapanunotan na, kailian, pabor kami la unay a maiserra dayta a paset uray ket Domingo laeng met. Iti kasta, makerrasan ti nakaro nga asuk nga ipugso ti tambutso dagiti lugan, nangruna ket pasang-at dayta.

Natural nga agrebulosion ti makina dita. Ket uray dayta la nga aldaw met a medio makalang-ab ka iti basbassit nga asuk ket mayat ti magmagna.

Awan dakes na dayta nu ditay agriri. Adda maysa a nakita tayo a siudad iti umamianan a paset ti kailokuan ti adda kasta a kalye da. Iti siudad ti Vigan. Adda maysa a kalye idiay nga ultimo motorcycle ket saan a mapalubosan a magna. Ngem ti intay laeng nakita ket mabalin ti kalesa nangruna no adda pasaheros na a turista.

Nagdalus dayta a kalye. Dagitay laeng aglaklako iti souvenir ti adda dita a makitam. No saan tayo nga agbiddut, isu dayta ti Kalye Crisologo. No maaramid dagiti sabali a siudad ti kasta, ditay ngata maaramid ditoy siudad ti Baguio?

Ti rigat na kadatayo, awan a pulos panangbigbig tayo iti nasayaat a gapuanan ti pada tayo a tao nangruna kadagiti opisyales tayo. Uray nagpintas ti programa na, kagura tay latta wenno ibaga tayo a madi. Ano ba talaga kuya?

Kas kay la naulaw no kasta. Mayat la ngaruden, dillawem pay laeng. Imbes koma a suportaran tayo ti nasao a programa, kas met laeng iti programa wenno kampania kotra illegal drugs ti agdama nga administrasyon. Adu latta ti intay maibaga. Nagadu ti mangdillaw. Porke kanu nalabsing ti karebengan pantao.

Human rights violation nangruna no ti napapatay ket maysa a maatap a drug addict. Nagadu nga intay madillaw. Ibaga a shout out wenno ania pay. Saan kanu a nagna iti husto a proseso. Ngem no adda narames a maaatap a gapuanan ti drug addict, agulimek da. Wenno adda natay a polis a gapu iti pannakiranget dagiti managdakdakes, ania ti kuna da? Awaten da a ta trabaho da.

Ania a kita ti panagrasrason, ano ba talaga kuya, este Kayong?