Army nagpaay iti Organic Farming Seminar kadagiti mannalon ti Ilocos

June 1, 2019 Headlines

STA. CRUZ, Ilocos Sur – Impamuspusan dagiti miyembro iti 81st Infantry Battalion (IB) iti Army iti pannakaaramid iti seminar ti organiko a panagtalon kadagiti nadumaduma nga komunidad sadiay Ilocos Sur tapnu matulungan dagiti mannalon nga ibaba iti gastos da iti panagtalon da babaen iti nangatngato a produksion ti apit da.
Inyusuat ni Lt. Col. Charles DZ Castillo, commander iti 81st IB ti Army iti pannakaaramid iti nasao nga organic farming seminar kadagiti komunidad iti probinsia gapu nga nadakuatan iti Community Support Program (CSP) team na nga iti maysa nga parikut dagiti mannalon ket iti nangato unay nga presyo dagiti maaramat iti panagtalon.
“Babaen iti seminar ti organiko a panagtalon, tulungan mi dagiti mannalon nga mapataud iti libre ken di makadangran iti aglawlaw nga organiko nga abuno manipud iti adda nga gagangay nga kinabaknang ti daga iti komunidad da,” kuna ni Castillo.
“Yantangay nga saan kami nga eksperto kadagiti teknolohia iti agrikultura, innala mi iti kinasigo dagiti agricultural technicians manipud Office of the Provincial Agriculturist (OPAG) sadiay Ilocos Sur ken iti opisina iti municipal agriculturist,” kinuna na.
Kinuna ni Castillo nga apaman iti ibaballaet iti CSP team, iti pinagkuyog nga agriculture technologists manipud OPAG-Ilocos Sur ken iti Municipal Agriculture Office iti Salcedo, Ilocos Sur nga indanguluan ni Remedios Enovejas ket sibaballigi nga naisayangkat iti Organic Fertilizer and Pesticide Production training sadiay San Tiburcio, Salcedo, Ilocos Sur idi Abril 23, 2019.
Addaan 50 mannalon nga miembro iti Sinabaan Farmers Association ti barangay San Tiburcio iti nakipaset iti nasao nga panagsanay.
“Iti CSP team ket naibaon sadiay barangay San Tiburcio idi Disyembre 5, 2018 nga addaan kangrunaan a panggep nga tulongan dagiti sibilian kadagiti parikut da.
Nangaramid iti maysa nga survey dagiti miembro ti CSP tapnu maamuan dagiti isyu iti barangay nga maysa kadagiti tinukoy ket iti nangato nga presio iti agricultural farm inputs,” kuna ni Castillo.
Bayat iti seminar ti produksion iti organiko nga abuno ken pestisidio, kinuna ni Castillo nga nalawlawagan dagiti mannalon iti kinapateg ken naimbag nga benepisyo iti organiko nga abuno isu nga inpaganetget dagiti techinicians nga iti teknolohia ket saan na laeng nga pababaen iti gastos ti panagtalon, mailisi pay dagiti taltalon iti possible nga pannakadadael dagitoy gapu iti napalalo nga panagusar iti inorganiko wenno synthetic nga abuno.
“Nakasagana kami met nga tuladen iti pannakaaramid iti agriculture technology seminar kadagiti sabali pay nga komunidad iti Ilocos Sur ken Ilocos Norte,” kinuna na.
Nagyaman ni Castillo kadagiti mannalon iti barangay San Tiburcio iti panangawat iti tulong da ken iti Department of Agriculture, iti OPAG ken Municipal Agriculturist iti panakitinnulong da nga nagturong iti balligi iti panagsanay.
Kas paset iti CSP project sadiay barangay San Tiburcio, kinuna na nga maysa nga multistakeholders forum iti naidatag inton Hunyo 7, 2019 nga pakipasetan dagiti umili ken lokal nga opisyal.
Dumar-ay met dagiti pannakabagi iti PIA, DA, National Tobacco Administration (NTA), National Irrigation Administration (NIA), PNP, DTI, DOLE ken DAR.
“Insayangkat mi daytoy nga CSP, ken iti multi-stakeholders forum karaman dagiti umili ti Ilocos Sur ken pannakabagi dagiti nadumaduma nga ahensia ti gobyerno a kas panagkumit mi kadagiti
paglintegan ken pagalagadan iti EO 70 nga impaulog ni Presidente Rodrigo R. Duterte idi Disyembre 4, 2018 nga naibilin iti panagtitipon iti amin nga ahensia ti gobyerno nga mangpaay iti nasken nga suporta para iti Task Force to End Local Communist Armed Conflict,” kinuna ni Castillo.
 
PIA1/PMCJr./ABN