Basura, basuraaa! Part 2

January 21, 2019 Sirmata ken Tagtagainep ni Mang Gusting

Naimbag nga aldaw tayo manen kakailian, kaarruba, gagayyem ken saan a gayyem, hehehe, unayen Kayong Angkuan ta uray saanen a gagayyem.

Marikna yo kadi met ti lammin a marikrikna wenno mapaspasaranmi ita ditoy siudad ti saleng? Apowww, nalammin latta kakayong, kaarruba…dita ayanyo, kumusta ti klima dita?

Iti napalabas, natopiko tayo ti maipapan iti basura ket, sapay la koma ta iti masungad a flower festival ket saan met a mapasamak ti kas iti napasamak idiay Metro Manila idi maiparada ti kunada a Black Nazarene a no sadino ket ginabsuon a basura ti imbati dagiti tattao a nangur-uray iti parada. Kas iti sigud, adu ti awan disiplinana iti bagbagina a kasla baboy ti ugalina nga iwarana lattan ti rugitna iti sadino la ditan, apay kayatyo kadi ti maawagan iti baboy?

Kadagiti napalpalabas a flower festival wenno Panagbenga, parikut ti basura nga imbati dagiti nangur-uray iti parade ngem, pagimbaganna laeng, kalpasan ti parada, adda dagiti volunteers nga agpidut kadagiti basura ken adda met ti trak ti basura manipud iti opisina ti gobierno nga akin-sakup iti daytoy ket surotenda a piduten ken sagadan dagiti basura, bisita man wenno mismo a taga-Baguio wenno agindeg iti siudad ket adda met dagiti awan disiplinana, isuda pay ti agiwara, puera delos Buenos a kunada, ngem talaga nga adu’t agug-ugali a baboy.

Ladingiten mi kabarangayan ken kakayong no adda dagiti madalapus iti imbagami ta dayta met ti paliiw tayo, gapu iti kaawan disiplina tayo, madadael ti sigud a pannakaidayaw ti siudad iti napalabas a most greenest and cleanest city ket naawatna pay ti hall of famer iti dayta a pammadayaw. Ngem, kasla nalipatan tayon dayta a pammadayaw ta awanen disiplina tayon. Malagip tayo pay, dinaydayawda idi ti mayor tayo gapu ta mismo nga isu ket agpidut pay iti basura.

Adda malagip tayo ket dayawen tayo unay daydiay a gangannaet wenno foreigner a babai ta nag-viral ti video na gapu ta nakitada nga agpidpidut iti basura idinto ta kadatayo a Pinoy nga agindeg, ditay pay maaramid dayta no di ket datayo pay ti agiwara. Idi damo tayo ti bumaddek ditoy siudad ti Baguio, inar-arapaapkon ti agnaed ditoy, adun ti nadandanun tayo a lugar ngem toy siudad ti saleng ti nagustuan tayo ken arapaaptayo a pagnaedan. Malaksid iti napintas a klima, nadalus ti aglawlaw ken manmanu pay idi ti babbalay ken pasdek, ideal a pagnaedan a kunada. Sipud idin saanen a napunas iti panunotko ti regget ko a makapagnaed ditoy ken pangbuklak iti pamiliak ket saanak a napaay, natungpal dagiti tagtagainepko ngem dagiti daddduma a sirmatak para iti siudad ken masakbayan, nadadael gapu ngarud ta dagiti adu a pinuon ti saleng, nasukatan iti babbalay ken pasdek.
Sabagay kunada a kasta a talaga ti panagdur-as wenno development iti maysa a lugar, adu ti maisakripisio nga agpapan nakainsigudan nga aramid ken panagug-ugali ti maysa a tao. No intay sirmataen ti masakbayan, kasla awanen namnama pay a maisubli ti talaga a kinalamiis ti siudad ken saanen nga agat-saleng ti malang-ab mo no bumangonka iti agsapa ket tumandag ka iti tawa wenno beranda ti balaymo ta asuk metten ti sumabat kenka.

Opssss, kakayong, naimasantayo manen ti nagsasarita ket ne amangan no kita-kitaennak manen ni editor. Ala kastan kakayong, agingga iti sumaruno manen nga intay panagiinnistoria, babayooo tsuptsup muahmuah.