Benguet LTO pinaigting ang anti-colorum drive

February 9, 2018 Latest News

LA TRINIDAD, Benguet – Pinaigting ng Land Transportation Office (LTO) Benguet District ang kampanya nito sa “anti-colorum” at tinutugis ang mga vans-for-hire na bumibiyahe sa ilang tourist spots sa probinsiya na walang kaukulang permits.
Dahil dito ay iniulat ng lokal na ahensiya ang mas mataas na koleksiyon sa taong 2017.
Sinabi ni Arsenio Bagtang, officer-in-charge ng LTO Benguet, na nagtalaga ng mga enforcement units sa mga tourist spots sa probinsiya lalo na sa munisipalidad ng Kabayan kasunod ng mga ulat ng tumataas na bilang ng sasakyan na naghahatid ng mga pasahero kahit walang kaukulang dokumento para mag-operate.
Ayon pa kay Bagtang ang mga vans ay ginagamit sa paghahatid ng local at foreign tourists na bumibisita sa Mt. Pulag na nasa Kabayan, isa sa 13 munisipalidad ng Benguet.
Nasa Kabayan ang malaking bahagi ng Mt. Pulag national park, mummies at ang twin lakes na kinilalang isa sa mga pinakamalilinis na mga ilog sa mundo.
Subalit sinabi ni Bagtang na iniulat ng enforcement units na nahihirapan sila sa paghuli sa mga pinaghihinalaang colorum na sasakyan lalo na ang mga van na may radio transceivers na ginagamit nila upang alarmahan ang ibang drivers na may LTO personnel na nagsasagawa ng inspeksyon at paghuhuli.
Sa kampanya laban sa mga illegal na aktibidad gaya ng pagkakaroon ng mga “fixers” ay sinabi ni Bagtang na may closed circuit television cameras (CCTVs) ang LTO-Benguet upang imonitor ang mga aktibidad ng mga fixers.
Ilang opisina ng LTO kabilang ang iba pang ahensiya ng gobyerno ang nagpapatupad ng isang “no-fixer” policy upang mahikayat ang mga kliyente na direktang makiugnayan sa mga personnel at mahadlangan silang magbayad ng karagdagang fees sa mga fixer.
Sa pinaigting na kampanya laban sa bogus public utility vehicles, registration ng motor vehicles, license fees, at penalties mula sa pagpapatupad ng batas ay iniulat ng opisina ang pagtaas sa koleksiyon.
Para sa motor vehicle registration ay nakakolekta ang ahensiya ng mahigit P81 milyon na nilagpasan ang target na P77.15 milyon o may pagtaas na 8 porsiyento mula sa 2016 koleksiyon na P74.9 milyon.
Sa license fees naman ay nakakolekta ang LTO-Benguet ng P5.98 milyon na mas mataas sa target na P3,082,370.
Sa law enforcement ay tumaas ang koleksiyon na P5.9 milyon kumpara sa 2016 koleksiyon na P1.71 milyon.
Sa datos ng LTO-Benguet ay nagpakita rin ng pagtaas sa bilang ng inirehistrong sasakyan, mula 30,444 noong 2016 sa 35,161 noong 2017.  ABN