Beterano ti WWII nilagip ti 74th tawen a wayawaya

March 30, 2019 Headlines

SIUDAD TI SAN FERNANDO, La Union – Maysa ni Benjamin Flores, 92 anyos itan, manipud Pagudpud daytoy nga siudad, kadagiti sumagmamano nga sibibiag pay nga guerilla fighters nga nakidangadang kontra puersa ti Hapon idi Maikdua a Gubat Sangalubongan (WWII), 74 tawennen iti napalabas.
Silalawag nga malagip ken inranudna iti napakumbaba nga kontribusionna kas kaubingan nga miembro dagiti gerilia nga nakidangadang sadiay Bacsil Ridge, kabayatan dagiti kasipsipngetan nga aldaw ken bulan ti gubat idi 1945 kontra dagiti soldado ti Hapon agingga nagsanudda iti kabambantayan ti Cordillera.
Iti bassit nga kuaderno nga inruarna ket impakitana ti listaan dagiti padana ken sibibiag pay nga betereno, innem ti bilangda. Maysa ni Flores kadagiti timabuno iti pananglukas ti Philippine Veterans Bank (PVB) iti pito-a-panel nga World War II History Wall kabayatan ti inagurasion iti napabaro nga pasdek a sanga ti opisina ditoy siudad.
“Daytoy nga diding ket maysa nga simbolo ti kinatured ti amin nga beterano, nangruna iti bukod tayo nga bannuar, nga sipipinget nga nakidangadang kontra iti puersa dagiti Hapon,” kuna ni PVB President ken Chief Operating Officer Renato Claravall, maysa met nga anak ti beterano.
Maysa nga nalatak ket ni Col. Gregorio Hufano, agdindinamag nga ni ‘Apo Bunog’, nabirngasan a kas Bannuar Ti La Union, nga idauluanna dagiti tropa idiay gubat ti Bacsil Ridge.
Malaksid kadagiti wall panels nga nangted istoria iti World War II ditoy Pilipinas tampok dagiti pasamak iti probinsia, addaan met dua a display cases nga addaan war artifacts, paraphernalia, ken memorabilia iti uneg ti banko.
Kabayatanna, iti ili ti Bauang, maysa nga baro nga marker ti kasta met nalukasan sadiay town plaza tapnu malagip dagiti kinabanuar ken sakripisio dagiti ap-apo nga nakidangadang kontra puersa ti Hapon.
“Dagiti beterano nga kimmadua iti United States Armed Forces in the Philippines – Northern Luzon (USAFIP-NL) ti 11th, 14th, 15th, 66th, ken 121st Infantry Regiment ket ordinario laeng nga umili a kas kadatayo nga nangpanaw kadagiti pagtaenganda ken dida nagkedked nga kumadua ken makidangadang agingga kaudian nga angesda tapnu ti wayawaya ken dignidad ket maisubli,” kuna ni Philippine Veterans Affairs Office (PVAO) Region 1 officer-in-charge
Grace de Villa Labarinto.
Maysa nga cultural night ti nangleppas iti pasamak idi Marso 21 nga nagpabuya dagiti nadumaduma nga grupo manipud nadumaduma nga secondary schools para kadagiti ubbing ken umili.
Sakbayna, indauluan ti gobyerno ti siudad iti pananglaglagip ti balligi ti gubat sadiay Bacsil Ridge baiten ti maysa nga wreath laying ceremony, ecumenical mass ken inagurasion ti maysa nga view deck iti nasao nga lugar.
Maysa nga symbolic marker ken monument para dagitoy nga puersa ti Pilipino iti naipatakder sadiay kabantayan ti Bacsil Ridge, adda siam nga kilometro amianan a daya manipud sentro ti siudad.
Maysa daytoy nga nalatak nga lugar ti gubat idi kabayatan ti World War II sadiay La Union nga sipipinget nga nakidangadang dagiti puersa ti Pilipno ken sumagmamano nga soldado ti US kontra dagiti puersa ti Hapon.
Iti pannakaparmek ti Bacsil Ridge ket nangted dalan para iti pannakatnag ti Besang Pass idi Hunio 14, 1945 nga nangpilit kenni Gen. Tomoyuki Yamashita nga sumuko idi Setiembre 2 iti pareho met laeng nga tawen.
(PIA-1/PMCJr./ABN