Gov. Pacoy, pinagtibay ang MSMEs sa La Union

July 16, 2017 Provincial

Pormal na inilunsad ang 2017 Micro, Small and Medium Enterprises Development (MSMED) Week Celebration na may temang “7Ms Towards a Shared Prosperity for ASEAN MSMEs” na suportado ng Provincial Government of La Union (PGLU) sa pangunguna ni Gov. Francisco Emmanuel “Pacoy” Ortega III, Department of Trade and Industry (DTI), kasama ang La Union MSMED Council noong July 11, 2017 sa La Union Agri-Tourism Center, City of San Fernando, La Union.
Sentro ng nasabing pagdiriwang ang lubos na pangako ng gobernor bilang Co-Chairperson ng MSMED Council na maunawaan ang layuning mapalakas ang potensiyal ng local enterprises upang tiyaking ang economic gains ng Agri-Tourism Industry ay para sa ikabubuti ng pamumuhay ng bawat entrepreneur ng probinsiya.
“As we look to bring progress and prosperity to the people of La Union, our MSMEs will be front and center in our journey to transform La Union to become the Heart of Agri-Tourism in Northern Luzon,” ani Pacoy sa paglalarawan ng mga negosyante at home grown business na nasa gitna ng paglago at pag-unlad ng lalawigan at munisipalidad. Higit na idiniin niya na ang kanyang pangitain ay mahalaga sa pagpapaunlad at pagtatatag ng mga negosyo na pag-aari ng mamamayan at ang tagumpay nito ay posible lamang sa pamamagitan ng diwa ng entrepreneurship at ang pagsisikap at pagpapasiya ng mga tao.
Ang exhibit, na tumagal mula July 11-14, na may layuning makilala ang kontribusyon ng bawat MSMED, One Town One Province (OTOP) at iba pang Income Generating Projects (IGPs) at bigyang importansiya ang 7Ms (Mindset, Mastery, Mentoring, Money, Market, Machines at Models), upang pasiglahin ang Agri-Tourism industry ng probinsiya ng La Union upang maging competitive at dynamic habang binabago ito patungong ASEAN global market.
Sinabi ni DTI-La Union Provincial Director Daria R. Mingaracal na ang MSMED ay nakipag-ugnayan sa PGLU upang bigyan ng tulong at suporta ang lokal na mga negosyante upang makasabay ang mga ito sa bilis ng merkado at maisama ang iba pang micro entrepreneurs at agriculturists ng lalawigan.
Sa mga display ng one-stop-shop ay ipinakita ang local products tulad ng dragon fruit, ube wine, lemon grass tea, bottled fish at corn oils. Sa parehong araw, naghandog ang mga vocational scholars ng Technical Education and Skills Development Authority (TESDA) ng serbisyo tulad ng libreng manicure, pedicure, foot spa at massage.
Nagsagawa rin ng financing forum at assistance para sa mga potensiyal MSMEDs at small business corporations na inisponsor ng Development Bank of the Philippines, Rang- ay Bank, Land Bank of the Philippines at iba pang financial institutions. Hana Josua C. Martinez, PITO-LU / ABN