Kaanunto ngata a sumingising?

August 28, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna. Nepnep wenno layos kadi pay la dita luglugar yo, makabulanen kayong a dikam nainitan, umangpepen a kunada.

Sakbay man pay kakailian, Kayong Angkuan, nga intay ituloy ti manglukais kadagiti nababara nga isyu ita ket rayray-awen tayo man pay ti bagbagitayo. Iti naminsan,  dumaw-dawat ni Budoy iti kuarta ken nanangna ket…

Budoy: Inang mangtedka man iti lima pesos mo.

Inang: Awan kuartak.

Budoy: Inang mangtedka man iti lima pesos mo.

Inang: Awan kuartak kunak la ngaruden.

Budoy: Lima pesos mo man inang.

Inang: Ne, ta—ulitem pay maluenkan Budoy.

Budoy: Inang adda pang-or mo?

Inang: Awan.

Budoy: Inang kuartam man.

Hahahha, anak ti tukling a balo!

Iti kallabes, topik tayo ti maipapan iti NFA kayong, ita, daytoy man napaut a nepnep ken layosna ti padamgisanta sakbay nga inta darundonen ti topik ita. Damagek man laeng kayong angkuan no apay a naglaka metten nga aglayos ita iti kapatagan? Saan a kas idi nga umdasen ti karayan wenno waig a pagnaan ti danum nga uray kasanu’t pigsa ti bayakabak iti manu bulan nga uray pay makuna nga adda bagyona. Inar-arapaap ko ti mataginayon koma a kinapintas ti nakaparsuaan nangruna iti siudad ti saleng a napilik, natagtagainepko a pagnaedan ken pangbangonan iti pamiliak ta awan umasping ken diakto isukat kadagiti aminen a lugar a nakadandanunak kangrunaan la unay ti klima nupay napalalu a lammin no dumteng ti bulan ti berrrrrrrr a kunada agingga iti arinunos ti Marso. Idi kayong Angkuan, namsek pay laeng ti siudad iti saleng, tawen 1970’s ta isu’t kaadatan ditoy…malang-ab mo pay laeng ti agat-bulong wenno kayo ti saleng no iti apagsingising ti init ket rumuarka iti kuartom nga umigup iti umas-asuk a barako a kape. Ngem apayen ta ita ket naras-rasay pay ngem kuaresma a kunadan ti kayo a saleng ta pasig metten a nagpintura ti makitam iti bantay. Isu a kayat tayo man wenno saan, mapadasan tayo ti naglaka a panaglayosna ta awanen dagiti kaykayo wenno ramut ti kaykayo a mangtengngel iti bayakabak ti todo, aglaylayonen daytoy iti baba a pasig metten a sementado nga uray kunam nga adda kanalna ta nasullatan met iti basura.

*****

Iti patad wenno iti lowland a kunada, adun ti lugar a sigud a di malaylayos ngem apay ita nga agdinakkel met la unayen ti danum, adda payen laokna a pitak ti aggapu iti surong? Ta kasanu kayong angkuan ket kas iti inta nakuna, kalbon dagiti bambantay ket awanen kaykayo a mangtengngel ti daga ken danum manipud iti tangatang. Ket ditay koman masdaaw no bassit laeng a todona ket layos ti intay masagrap. Akim-basol? Sa kay to makararagan amin a sasanto ken sasanta, dikay amirisen no ania ti gapuna? Tao met laeng ti nangdadael ken mangdaddadael iti kinangyed ti naskaparsuaan a sagut kadatayo ti Ama a Namarsua iti langit ken daga ken aminen a nabiag ken saan.

*****

Sakbay man a pumakada kami ta overtime tayo manen, damagek man laeng no ania ti makunam Kayong iti mapatpatakder a siudad iti central Luzon partikular iti Tarlac a proyekto ti Duterte administration a no sadino ket maaramid ti maysa a siudad a kagudua ti kalawana iti kalawa kanu ti Metro Manila? Bilyon a pesos or dolyar sa pay ketdi ti gatad daytoy a siudad, nagdakkel a kuarta kailian ngem—priority ngata dayta? Sabagay segun iti damag, adu’t mapataudna a trabaho ta ditoy to ti pakaipanan iti adu a pasdek negosio ken pasdek metten para kadagiti opisina ti gobierno…opssss, ituloytanto kayong iti next isyu, mabalin?

Kasta pay kakayong ta ne, overtime tayo manen… babayoo, tsup tsup muahmuah.