Kalgawen Kakayong!

March 24, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Ngem sakbayna, kakayong, adtoy man pay ti ababa nga inkam pangray-aw kadakayo tapno makerrasan ti dudukot tayo a kunada.

Nagtagtagainep ni Mang Gusting ket kampay idi tinulongan ni Mang Gusting ti ansisit. Kuna ti ansisit,maited amin a kiddawna…

Ansisit: Gustilo, gapu ta inaruarnak iti botelya a nakaipupokak iti adu a tawen, maited ti tallo a kiddawmo.

Gustilo: Agpayso ansisit? Sige ngarud. Kayatko ti adu a kuarta wenno pirak.

Naited ngarud ti adu a kuarta. Naibunton ti sinako a kuarta iti sangona.

Ansisit: Ania pay?

Gustilo: Kayatko ti adu a taraon nga agkakaimas.

Nagparang ti agkakaimas ken adu a makan iti sanguanan ni Mang Gusting.

Ansisit: Maudim, ania pay ti kayatmo?

Gustilo: Kayatko ti agbalin a nataer a kas ken Pare Jun ken Editor Thom ket no makitadak dagiti babbai, ikkatenda ti sapinda!

Iti apagdarikmat, nagbalin ni Mang Gusting nga inidoro….

Hahahahaah… ania, nakapidot kayo met laeng iti adal wenno leksion, kakayongko ida ken nagrungit kayo met laeng?

Ala ngaruden, agplastar kayon ta rugyantayon ti agiin-nistorya. Daytoy man intay mapaspasaran ita a tiempo ken klimana, kakayongmi ida, nupay maulit-ulit daytoy nga inkam dakdakamaten kadayo kayatmi laeng nga ipalagip kadagiti kailiantayo a di man pulos mangipateg ken awan serbina kadakuada ti mapaspasamak iti aglawlaw tayo. Ngem no datayo, saan a kastoy ti sirmata ken tagtagainep tayo para iti nakaparsuaan ken intay mapasaran koma iti daytoy a biag. Iti siudad ti Baguio no intay malagip ken husto kami, adda inlongalong idi ti maysa a konsehal ti siudad a tunggal koma solar ket adda maimula a fruit trees. Sus ina, ania ketdin a nagsayaat koma ta malaksid nga adda pagpurosam iti prutas inton agbunga, makatulong pay nga ag-absorb wenno mangsepsep iti kunada a rugit ti angin wenno carbon dioxide. Husto met laeng ti intay lawlawaten kabsat?

Kayatmi a sawen, kayong angkuan, koma, saan laeng a ditoy siudad ti kastoy ta imposiblensa a mapasamak daytoy ditoy siduad ta ultimo sangsangadangan a paset ti solar ket nairamanen a napatakderan iti building wenno balay. Adda pay alad nan diding metten ti balayna, kasano ngay pay a makamula? Ngem adda latta met dagiti naayat pay laeng iti mulmula ket ipamuspusanda. Koma kakayong, ipamuspusan tayo nga adda latta koma mula iti tunggal maysa nangruna kadagiti medio dadakkel a babbalay. Agaramid tayo iti makuna a roof top garden, saantayo a bubongan ti patakder tayo  ket pagbalinen tayo a roof top garden. Uray dagiti masetas laeng ken natnataeng ti intay imula. Malaksid a nangayed ti makita, adda pay maitedna a taraon.

Ita a kalgaw, adu manen ti agsanuong iti kaawan danum, wenno nakirang ti danum nangruna ditoy siudad ti saleng isu nga awan intay koma aramiden no di  aginot iti danum. Kanayon a  kastoy ti maigunamgunam ngem adu latta dagiti saan a mangikaskaso iti daytoy a kiddaw dagiti agtuturay wenno opisyal a naayat pay laeng iti kinangayed ti nakaparsuaan, isu nga intay koma met igunamgunam ti intay panagsaluad iti nakaparsuaan. Intay saluadan koma ti parabor ti Apo a Mannakabalin amin.

Ala ngaruden, kasta pay kakayong ta ne, overtime tayo manen ket sal-ot daytoy ti imasna, bayat a sursuraten tayo daytoy a kolum tayo nagawan manen ti koriente. Kaaduanna a kastoy ti mapasaran no kastoy a kalgaw. Ala, kasta pay ket ne nakaadu tayo manen. Babayoo, tsup tsup muahmuah.