La Union, Ilocos Sur, Ilocos Norte nangted tulong kadagiti biktima ti Taal

January 27, 2020 Headlines

SAN FERNANDO La Union – Nangipatulod iti probinsia ti La Union iti tulong kadagiti naapektaran nga indibidual ken pamilia iti panagbettak ti Taal Volcano sadiay Batangas. Indanguluan daytoy ti provincial government ti La Union nga maysa a PhP300,000 gatad iti tulong pinansial iti maited kadagiti biktima babaen iti naaprubaan nga Sangguniang Panlalawigan Resolution 071-2020.
Nangisayangkat met iti city government ti San Fernando iti bukodda a relief drive babaen iti maysa a drop-off point idi Enero 22 sadiay People’s Park manipud 4 p.m. agingga 6 p.m. tapno mangawat iti aniaman a donasion.
Kangrunaan, dagiti mabalin nga maidonar ket food items, medicines, hygiene kits, ken sleeping kits. Dadduma pay a donasion ket karaman iti N95 mask wenno regular sanitary masks, safety goggles, mosquito net, pungan ken ules, mats, slippers, ken baro nga kaw-kawes ken undergarments.
Adu a tao iti nangipatikna ti tulongda kadagiti biktima nangruna iti panagdonar ti nausaren nga kaw-kawes. Ngem kinuna iti city government nga istriktoda nga saan nga awaten dagiti nausaren a kaw-kawes tapno malappedan iti sakit nga mabalin a maiyakar babaen iti nausaren a kaw-kawes.
Kabayatanna, dagiti lokal a gobierno ti Balaoan ken Agoo ket nangisayangkat met iti bukodda a donation drive para kadagiti bakwit ti Taal.
Saan met nga nagpaudi iti probinsia ti Ilocos Sur nga mangipaay ti tulong kadagiti apektado a komunidad ken bakwit iti panagbettak ti bulkan nga Taal.
Nangibaon iti Provincial Disaster Reduction and Management Office (PDRRMO) ken Provincial Social Welfare and
Development Office iti grupo nga mangitulod kadagiti tulong, kas iti nalinis a mainom nga danum ken makan; tulungan dagiti tattao; ken tumulong kadagiti sabali nga ahensia ti gobierno iti ground operations.
Umuna ditoy, nangipila ni Board Member Efren Rafanan iti maysa a resolusion nga inaprubaran iti Provincial Board nga kumidkiddaw iti provincial government nga idanguluan daytoy ti maysa a kampania ti donasion para kadagiti biktima ti panagbettak ti Taal Volcano.
Iti pribilehio ng panagsaona, kinuna ni Rafanan nga idi nadidigra iti probinsia ti Ilocos Sur ni bagio nga Ompong, maysa iti probinsia ti Batangas kadagiti nangited iti tulong; isu nga ita a panawen, dagiti Ilokano met iti tumulong kadagiti Batanguenos.
Iti parehas nga resolusion, inallukoyna iti umili ti Ilocos Sur nga parubruben iti napintas a nga ugali iti Pilipino, kultura ken espiritu ti bayanihan.
Innayonna nga makitinnulong iti PDRRMO ti Ilocos Sur kadagiti kapadada nga opisina idiay probinsia ti Batangas ken Laguna tapno matukoy dagiti lugar nga agkasapulan iti tulong.
“The North answers the call.” Daytoy nga linia ket nai-post iti official social media page ti provincial government iti Ilocos Norte nga kagiddan iti panagtulod iti maysa nga truck iti relief packages para kadagiti bakwit sadiay Batangas kalpasan iti panagbettak ti bulkan nga Taal, tallo nga aldaw kalpasan iti insidente.
Napunno iti truck ti canned goods, bottled water, sleeping mats, N95 face masks, ken dadduma pay nga relief items para kadagiti nakaro nga naapektaran nga biktima.
Malaksid iti relief packs, nangipatulod met iti probinsia iti tulong pinansial iti provincial government ti Batangas. “Punuen tay koma dagiti sarili rayo iti agpayso nga espiritu ti Ilokano iti timpuyog ken ayat, bayatna nga malsatan tayo nga pada-pada dayoty a pannubok. Kaduayo dagiti Ilokano, Barako,” kuna ni Governor Matthew Marcos Manotoc iti official page nga imbaonna iti panagiwaras kadagiti relief items idiay Batangas.
Malaksid iti provincial government, maysa nga naurnong nga tignay manipud local government ken pribado nga indibidual iti Ilocos Norte iti nangipaay ti tulong.
Nangikabil iti municipal government ti Piddig iti drop boxes iti lobby daytoy. Daytoy nga drop boxes ket para kadagiti donasion nga danum, taraon, kawes, ken personal nga kasapulan nga nagpatingga idi Enero 21.
Kasta met, nangayab met iti Provincial Veterinary Office para iti tulong ti indsutria ti animal nga nakaro nga naapektaran iti panagbettak ti bulkan.
Kabayatanna, immune a ngipatulodden iti probinsia ti Pangasinan iti relief goods.
 
JND-PIA-LU,AMB-PIA-IS,MJTAB PIA- IN/PMCJr.-ABN