MANNALON TI ILOCOS NORTE MAKAAWAT ITI TULONG A GASOLINA

March 21, 2022 Headlines

SIUDAD TI BAGUIO – Dagiti mannalon ti Ilocos Norte a nakaro a naapektaran iti dakkel nga ingangato iti presio ti krudo ket makaawat iti tulong a gasolina (fuel subsidy) manipud gobierno tapno mapabileg dagiti mulmulada iti daytoy a panawen ti kalgaw.
Pinasengkedan daytoy ni Provincial Board member Domingo C. Ambrocio idi Mierkoles kalpasan iti pannakaipasa iti Draft Resolution 2022-03-456, a mangmangted autoridad kenni Governor Matthew Joseph Manotoc a sumrek iti maysa a memorandum of agreement kadagiti nagduduma a gasolinaan para iti panangited iti gas vouchers kadagiti kualipikado a mannalon.
Imbaga ni Ambrocio nga umuna a napanunotda a mangipaay iti “PhP500 gatad iti gas voucher kadagiti nanumo a mannalon nga agtaltalon iti awan-irigasionna a taltalon”, ngem gapu iti agdadarison a presio ti gasolina, panggep iti gobierno ti probinsia a mangted iti ad-adu pay, depende iti kaadda iti pondo.
Iti tulong a gasolina kas tulong nga irigasion kadagiti mannalon ket pinanggep idi Nobiembre iti napalabas a tawen gapu ta dadduma a mannalon iti probinsia kas dagiti manipud Salbang Farmers Association sadiay Paoay, Ilocos Norte ket isuda ti immuna a nagkiddaw iti tulong a gasolina manipud gobierno ti probinsia.
“As of the moment, there are 1,000 target beneficiaries of the fuel subsidy program and we hope to increase more if we receive more requests(agingga ita a kanito, adda 1,000 puntiria a benepisario iti subsidy program ken mangnamnama kami nga nayunan pay nu makaawat kami iti ad-adu pa a kiddaw),” kuna ni Ambrocio.
Iti rabaw daytoy, inyanunsio iti Department of Agriculture (DA) umuna daytoy a lawas a tunggal maysa a mannalon ken mangngalap ket makaawat iti PhP3,000 fuel subsidy tapno bang-ar iti epekto iti ingangato iti presio ti krudo iti napalabas a tallo a bulan.
Paset daytoy iti umuna a gatad ti PhP500 milion nga namnamaen nga iruar iti DA para kadagiti mannalon ken mangngalap iti umay a bulan. Dagiti kualipikado a benepisario iti sidong ti fuel subsidy program ket dagiti agmulmula iti mais nga mangus-usar iti makina para iti panangpataud, manipud panangisagana iti talon agingga aktibidades malpas iti panagapit, ken dagiti mangngalap a mangus-usar iti de-motor a bangka nga agtimbang iti tallo a gross tons wenno bas-bassit.
Masapul a miembroda met iti rehistrado nga asosasion ken kooperatiba ken mangipakita iti pammaneknek a sanikuada ken agus-usar iti agan-andar a makinaria.
“Mangnamnamaak nga iti tulong a gasolina kadagiti mannalon ket makadanon kadakami iti kabiitan,” kuna ni Aristotle de Lara, maysa nga agmulmula iti mais manipud Barangay Pila, Laoag City.
(LA-PNA Ilocos/PMCJr.-ABN)