NASUROK 13K ARBs NAGUNGGONAAN ITI DAR ILOCOS NORTE SPLIT PROJECT

March 8, 2024 Headlines

SIUDAD TI LAOAG, Ilocos Norte

Imbaga ti Department of Agrarian Reform (DAR) ti Ilocos Norte nga 2,371 Collective Certificates of Land Ownership Awards (CCLOAs), a saklawen ti nasurok 13,000 ektaria, ti naparsela iti 13,749 individual land titles. Ti dagup a titulo ti daga, inbunong ti DAR iti 2,530 electronics titles (e-titles), saklawenna iti kalawa a 2,969 ektaria ti agricultural lands kadagiti 4,291 agrarian reform beneficiaries (ARBs) iti sidong ti Support to Parcelization of Lands for Individual Titling (SPLIT) project, kinunana ni Provincial Agrarian Reform Program Officer Vic Ines idi Mierkoles, Marso 6.

“Maragsakan kami nga iti panagproseso kadagiti individual e-titling iti sidong ti Project SPLIT ket rumangrangayen,” kuna ni Ines. Panggep ti SPLIT project a papartaken iti pannakabingay kadagiti CCLOA tapno maikkan dagiti benepisario a mannalon iti naan-anay a panagtagikua ken panagikut ti daga a taltanonenda.
Pinondoan ti World Bank daytoy ken panggep ti panangbingaybingay iti agarup 1.38 milion nga ektaria ti CCLOA iti intero a pagilian. Imbaga ni Ines a pinaaduda ti bilang ti personnel-da nga agtrabaho ti pannakapasingked ti CCLOA, a kunana nga iti lima-a-tawen a proyekto ket naikeddeng nga agpatingga ita a tawen.

“Ti pannakapasingked ket malpasto iti uneg ti umuna a semestre ita a tawen ngem iti panagrehistro ken pannakaiwaras (dagiti individual title) ket agpannuray iti pananganamong ti DENR (Department of Environment
and Natural Resources) maibasar iti proseso ti subdibision kasta met iti panagrehistro kadagiti titulo iti ROD (Registry of Deeds),” kinunana. Ti pannakaipatungpal ti SPLIT project ti DAR-Ilocos Norte ket nagranggo a
maikalima iti amin a Parcelization indicators a saklawen ti 2023 National SPLIT project implementation. Iti Rehion ti Ilocos ket maysa kadagiti kaunaan a rehion nga nairaman iti proyekto. Dagiti sabali a rehion ket iti Region 8 (Eastern Visayas) ken Region 9 (Zamboanga del Norte).

(LA-PNA Ilocos/PMCJr.-ABN)