OPISIALES ITI LA UNION DI UMANAMONG ITI DEATH PENALTY

October 15, 2022 Headlines

SUIDAD TI SAN FERNANDO, La Union – Inaprobaran dagiti miembro iti provincial board ti La Union nga indanguluan ni Vice Governor Mario Ortega iti maysa a resolusion a siiinget a bumusbusor iti pannakaipasdek manen iti death penalty ditoy pagilian. Imbaga ni Board member Jennifer Mosuela-Fernandez, autor ti resolusion ken siam pay a miembro iti board a kaduanga- autor nga iti panangisubli
iti death penalty ket saanna nga naan-anay a pukawen dagiti krimen ken iti rumbeng a maaramid ket mangpartuat kadagiti solusion karaman dagiti reporma iti sistema iti hustisia.

“Due to the weakness, corruption and inefficiency of our justice system, it is inappropriate to restore the
death penalty, otherwise, there could be miscarriage of justice (Gapu iti pagkapuyan, panagkunniber ken di episiente a sistema ti hustisia tayo, di maiparbeng nga isubli iti death penalty, ta no saan, maadaan iti pannakapaay iti hustisia),” kuna iti maysa a paset ti resolusion.

Dinakamat iti board nga iti napalabas, kaanoman nga aniaman kadagiti kailian tayo nga adda sabali a pagilan iti nakabasol, ken no mapatawan iti dusa a death penalty, kapilitan nga makipaasi iti gobierno tayo iti maseknan a gangannaet nga autoridad tapno maispal dagiti biagda. “If death penalty is restored in our jurisdiction, there is no moral ground to plea that the life of one of our citizens be spared from execution (No maisubli iti death penalty iti masakupan tayo, awan iti pangibatayan a moral tapno dawaten nga iti
maysa a biag dagiti umili tayo ket maispal manipud pannakapapatay),” kuna iti board.

Maikkan iti kopia ti resolusion iti opisina ni Presidente Ferdinand Marcos Jr., Senate President Juan Miguel Zubiri, Speaker Martin Romualdez ken dagiti Representante ti La Paolo Ortega, (1st district) ken Dante
Garcia (2nd district). Indatag manen iti nabiit ni Sen. Ronald “Bato” dela Rosa iti bill a mangisubli iti dusa a
patay kadua ni Surigao Rep. Robert Ace Barbers. Panggep daytoy nga ipatungpal iti death penalty para kadagiti nakaapaprang a krimen ken nasaknap a panagnegosio iti droga.

Iparit iti 1987 Constitution iti death penalty ngem naisubli iti panawen iti administrasion ni dati a Presidente Joseph Estrada gapu kadagiti nakaapaprang a krimen. Nawaswas iti linteg idi 2006 ngem naidatag mane nidi 2016 kalpasan a maipatugaw ni Presidente Rodrigo Duterte.

(JE/PMCJr.-ABN)