PANAGTARAKEN ITI KALDING, MANOK PARA ITI UMDAS A TARAON NAIDAGDAG KADAGITI MANNALON

July 9, 2022 Headlines

ILOCOS NORTE – Awawagan iti gobierno ti Ilocos Norte dagiti interesado a mannalon nga agtaraken iti kalding ken manok tapno maparegta iti umdas a taraon para iti probinsia.
Malaksid para kadagiti kalding ken manok, impadamag iti Provincial Agriculture Office a nasurok a siento porsiento a tukad ti kinaumdas no maipanggep iti produksion ti taraon iti probinsia.
Dinagadag ti Provincial Veterinary Office dagiti Ilocano nga agtartaraken iti baboy a sigud a naapektaran iti African swine fever (ASF) a padasenda iti alternatibo a panagtaraken iti dinguen bayat a maiprosproseso pay iti deklarasion a mawayaanen iti ASF ti probinsia.
Babaen iti programa ti gobierno ti probinsia nga “Agri Ka Dito”, dagiti kualipikado a mannalon ket maikkan iti kalding, karnero ken piek tapno maparegta dagiti pagbiaganda ita a tiempo dagiti pannubok.
“Currently, we are producing more than what we consume except for goat at 78 percent and poultry at 49 percent sufficiency level (iti agdama, mamatpataud tayo iti ad-adu ngem iti makonsumo tayo malaksid para iti kalding nga 78 porsiento ken manok nga 49 porsiento a tukad ti kinaumdas),” kuna ni Governor Matthew Joseph Manotoc idi Huebes.
Bayat a saan pay a naan-anay nga napasardeng iti sakit ti baboy, imbaga ni provincial veterinarian Loida Valenzuela iti maysa nga interbiu nga dagiti naapektaran iti ASF a mannalon ket naipaayan kadagiti maisandi a wagas iti panguartaan nga pamay-an ti panagtalon, kas iti produksion ti kalding, karnero, baka, ken manok.
Iti agdama, dadduma kadagiti munisipio nga umuna a naapektaran ti ASF ket naingato iti “pink (buffer) zones” ngem kaaduan kadagiti agtartaraken ti baboy ket agdudua pay nga agsublida iti panagnegosio.
Iti 16 nga ili ken siudad iti Ilocos Norte a sigud nga naapektaran ti ASF, iti Bangui laeng ti agtaltalenaed nga adda iti sidong ti red zone, bayat iti panagur-uray iti clearance manipud kadagiti autoridad ti gobierno.
(LA-PNA Ilocos/PMCJr.-ABN)