Protesta

May 19, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna.

Sakbay man nga intay ibuksilan ita ti kolumtayo, agrungiit tayo man pay met tapno maikkat ti hang over iti napalabas a barangay election. Nagsarak da Mang Gusting ken ti kaanakanna a nagaplikar kas seaman.

Eksena:

Aplikante: Agaplayak man a seaman, sir.
Kapitan: Nalaingka kadi nga aglangoy?
Aplikante: Ney, saan a sir.
Kapitan: Saanka ngarud nga agbalin, a.
Aplikante: Apay, diay piloto, ammona ngarud ti tumayab, Sir.

Wahahahahahaa.

Nalpasen ti Barangay Election, kabarangayan, ket agtakem metten dagiti baro a nangabak nga opisyal inton Julio 1, 2018. Ngem, kas napaliiw ken nasagap tayo a damag, adu dagiti nagbalin a parikut iti napalabas a barangay election, irregularities, vote buying ken dadduma pay. Adda pay dagiti tie nangruna iti pang-pitu ngem sakbay a maiproklamada, ma-break ti tie. Ti makunami ania rugyanyo ketdin ti agsagana tapno maipakitayo kadagiti kabarangayanyo a nagtalek kadakayo a saanda a nagbiddut a nangibotos kadakayo.

Iti batugmi a langit, kabarangayan, kailian, kakayong ania, segun iti naudi a damag mi, nangipilan ti agdama a kapitan ta naabak daytoy iti maysa laeng a puntos iti limmaban kenkuana a number one kagawad. Ngem segun pay iti ammomi, nasolbar daytan nga isyu sakbay a naiproklamada ngem, nalabit, dina maaklon a naabak ta maysa laeng a puntos. Ala ket karbengan ti tunggal maysa ti mangilaban a kunada iti kalinteganna. Hanggang may karapatan, ipaglaban, kunada ngarud… ngem iti benneg ti Comelec, tinto kanu korte ti mangikeddeng no adda mapasamak a re-count. Ngem agtugawen ti kabarbaro a kapitan.

Kas nakunami, maibilang no maminsan a maysa a kinatakrot ti saan a panangaklon a naabak ka iti maysa a dangadang. Nupay kasta, no adda ngarud nakitam a sinnaur wenno saan a patas a pangngeddeng nangruna kadagiti hurado, karbengam ti agprotesta. Ngem, nadaydayaw ka koma no sipupuso nga akkonem ti pannakaabakmo. Nupay kasta, iti benneg ti pulitika, kanayon a kunaen ti dadduma a naabak, nasaurda kanu. Addaka dita a vote buying ti gapuna, saan a inyindorso ti maysa a sekta wenno religious group, nadagdag bawas ken flying voters, sus maria kusina.

Iti met benneg ti maysa a sekta, saantayo a kuestionaran dagiti kamengna ngem ketdi, ti laeng saludsodmi, ania kadi dagiti criteria wenno paglinteganda a mangiyindorso iti maysa a kandidato. Ta no ditoy ayanmi, ania, segun iti pammaliiwmi, adda dagiti nayindorsoda a saan a credible wenno saan a kualipikado nga agbalin nga opisyal gapu iti nagduduma a rason. Ngem gapu ngarud ta du ti bilang daytoy a grupo wenno sekta ken mabilin dagitoy. A kayatna a sawen, kayatda man wenno saan ti kandidato iti lugarda, mapilitanda a mangibotos gapu ta isu’t bilin ti kangatuan a ministroda. Ti laeng makunmi ditoy, naikaten ti karbengan wenno freedom tay maysa a botante a mangpili koma idiay kayatna nga ibotos ken ammona a makabael. Kasla, malipit daytoy, ania ti tunggaperlnna, ti pitik ti pusona wenno panagtungpalna iti bilin a kunada a basol no salungasingem? Koma, awanen ti kastoy. Ited koma a wayawaya ti panagpili iti kayat nga ibotos saan ketdi nga adda mangidektar.

Ala ngaruden, kasta pay kakayong ta ne, overtime tayo manen, nakaadu tayo manen. Babayoo, tsup tsup muahmuah.