Provincial task force, inalerto ti LU kadagiti lumtaw a saksakit

September 18, 2017 Headlines

SIUDAD TI SAN FERNANDO, LA UNION – Inawagan ti probinsial a gobierno ti La Union ti Provincial Task Force Against Emerging & Re-Emerging Diseases idi Septiembre 13, 2017 iti La Union Technology and Livelihood Development Center (LUTLDC) tapno pagtungtongan ti pananglapped a maiwaras ti Avian influenza ken Japanese encephalitis iti probinsia.
Nagserbi kas honorary chairman ni Gov. Francisco Emmanuel R. Ortega III kabayatan a ni Dr. Hector T. Beñas, provincial health officer, ti timmakder a team leader.
Nakasentro ti nasao a taripnong iti updates maipapan iti Avian flu, Japanese encephalitis, ken sabali pay a vector-borne diseases. Nakipaset ditoy dagiti mangidadaulo kadagiti ospital, kameng ti La Union Provincial Police Office (LUPPO), ken dagiti pannakabagi ti nagduduma pay nga ahensia.
Kinuna ni Beñas a ti maitutop a pakaammo ket kasapulan tapno malapdan ti pannakaiwaras ti makaallilaw a damdamag ken maliklikan ti panic wenno panagbuteng dagiti umili.
Impakaammo ni Beñas a ti Malaria Elimination Hub iti Naguilian District Hospital (NDH) ket asidegen nga agbalin a fully operational. Kasapulan daytoy tapno maideklara a Malaria free ti La Union, kunana.
Impanamnama ti provincial health officer a mapasingkedan pay ti surveillance ken reporting ti task force tapno maipangato ti monitoring ken dagus nga agtignay no addaman ti outbreak ti sakit.
Nagserbi met kas main speaker ni Dr. Rosario Pamintuan, mangidadaulo iti Regional Epidemiology Surveillance Unit-Department of Health (RESU-DOH) iti Region I. Kinunana nga amin dagiti naireport a naapektaran ti Avian flu sadiay Pampanga ken Nueva Ecija ket nag-negatibo iti laboratory testing. Siniguradona a maibasar iti kaudian a report iti pagilian, zero cases ti pannakayakar ti nasao a sakit iti tao.
Ti Provincial Task Force Against Emerging & Re-Emerging Diseases ket nabukel idi 2010 tapno malapdan ti Dengue outbreak. Sipud idi, dakkel ti bimmabaan ti kaso ti Dengue iti probinsia. Iti agdama, ti task force ti naikkan ti akem a makigubat iti amin a klase ti saksakit ken lapdan ti pangta dagitoy iti masakbayan. MARCEL A. FLORENTINO, PITO-La Union / ABN