Sabuyan ng putik… Lalong grumabe pa!
Abril na. Kulang na lang sa apatnapung araw ang kampanyahan…eleksiyon na. Marami ang sabik. Marami rin ang inis. Ang dahilan – lalong gumagrabe ang sabuyan ng putik. Kung may kasabihang “below the belt” na atake…baka mas mababa pa sa belt ngayon. Saan ba ang mas mababa pa sa belt? YON nga ang “sapul” eh! Parang sinasabi mo pards na “Basagan ng ITLOG”. Yan nga ang ating sentro sa espasyong ito…pero may mga teka ka pa:
Ito ang mga ilan sa mga sandamakmak na mga mamanahin daw ng susunod na administrasyon: isyu sa West Phil. Sea, droga, ekonomya, patrabaho, insurhensiya at terrorism, enerhiya, kriminalidad, kapakanan ng mga OFWs, edukasyo, polisiya sa halalan, transportasyon, patubig – pabahay at irigasyon, serbisyo ng kuryente, presyo ng bilihin, pasahod, kahirapan, rehab sa kalamidad, at maraming iba pa. Baka abutin tayo ng Pasko, di pa tapos ang lista. Mantakin mo pala ang daming kahaharapin ng mga susunod nating opisyal – nasyonal at lokal.
Tanong: kaya ba yan ng mga tumatakbong kandidato? Ows, sabi ng marami. Baka sa salita lang at wala sa gawa. Tsk tsk…di natin sila masisisi. Maraming mga pangako ang napako. Marami ng sumpa na kasumpa-sumpa ang resulta. Baka raw kapag nakaupo na sila (hindi sa
nilalahat)…iba ang aatupagin.
Naggirian na ang barko ng Coast Guard ng Tsina at Coast guard natin kamakailan. Ilang metro lang ang pagitan. Sus mariakusina…eh, kung may makati ang kamay sa magkabilang panig at nagpaputok, ano kayang nangyari? Sus ginoong duwag….aba’y GIYERA NA. Buti na lamang at may pagtitimpi pa ang mga dearmas. Pero ang masaklap, sabi ng Tsina…karapatan daw nilang magpatrolya sa lugal kasi sa kanila.
Nakupowww! Anak ng singkit talaga. Ano ba ang talagang…ah, bahala na ang susunod na administrasyon. Bulong: baka naman nagpakitang gilas daw ang Tsina dahil may Balikatan o Military Exercise na naman ang US at Pilipinas ngayon? Ito bang Balikatan na ito ay masusukat natin ang tunay na pakay at malasakit sa atin ng Estados Unidos?
Bakit kaya medyo tahimik ang US sa isyu ng West Phil. Sea kahit gumigiri na ang mga barko ng Tsina sa atin? Ewan lang natin kung ano talaga ang isyu. Pero kung kay Pres. Duterte ang ating timbangin….lagi naman niyang sinasabi na kaibigan natin ang Tsina. Katunayan, marami tayong malalaking pagawang de gobyerno lalo na sa Visayas at Mindanao na ang katulong ang Tsina.
Ah, bahala na ang susunod na administrasyon kasi malapit na ang EXIT ni Digong. Naku!!! Halos maubos na ang espasyo. Balik na tayo sa isyu ng sabuyan ng putik. Talagang grabe na, pards. Sukdulang kalkalin na ang pinakamaliit mong kartada sa buhay.
Lahat yata ay pinakikialaman na para lang kuno ay makaungos sila sa kalaban. Di na tayo magbabanggit pa ng pangalan baka sumikat pa. Sa posisyong pang-nasyonal na lang…kita naman natin kung sinu-sino ang mga binabato ng putik maski magkakapartido pa sila.
Para daw silang mga bata na inagawan ng lollipop, eh. Hindi maganda ang mga ehemplong ito, di ba? Kung sa ngayon na wala pang resulta ng eleksiyon ay grabe na ang siraan…ano pa kaya pag tapos na ang halalan? Tiyak, mga talunan…n ga n g a k n ga k .
Dinaya – yan ang magiging sigaw. Suma-total…protesta ang kasunod. Sus, ginoong walang sapin…sa sandamukal na mga problemang ipapamana…ano kayang hilatsang susunod na administrasyon?
At ano naman ang kahihinatnan ng mga susunod nating lahi? Itanong na lang natin kay Covid-19. Baka mainis ire…ay biglang bumuwelta, lagot ang ating bansa. Nananahimik na nga si Covid-19 sa ngayon…pero ang mga problema, mas malala pa sa pandemya. Gising, kabayan.
Huwag magpakampante sa ngayon. Ga-bundok ang ating mga pasaning pampulitika plus Covid-19 pa. Kaya natin ito kung tayo’y magkaisa at magtulungan, hindi magsiraan. Tama na ang sabuyan ng putik. Maligo na lang kayo. Adios mi amor, ciao, mabalos.
Making Safe Schools Happen
April 4, 2022
