Transformative Education, isaksakad ni Gov. Pacoy

October 9, 2017 Headlines

SIUDAD TI SAN FERNANDO, LA UNION – Binigbig ni Gov. Francisco Emmanuel “Pacoy” R. Ortega III ti sakripisio ken kinasaet dagiti kameng ti La Union Federation of Parents-Teachers Association (LUFPTA) kabayatan ti LUFPTA 10th Congress idi Oktobre 3, 2017 iti Diego Silang Hall, Provincial Capitol, ditoy siudad.
Iti mensahena, kinuna ti gobernador a patibkerenna pay ti sekta ti akademia kas paset ti transformative governance program, “I am a parent, I am an educator, I am one with you.”
Inkari ni Pacoy ti naan-anay a suportana kadagiti opisial ti LUFPTA. Pinasingkedanna pay a mangipatungpal kadagiti nayun a programa, proyekto ken aktibidad a pagsayaatan dagiti ages-eskwela kadagiti pampubliko a pagadalan.
Ginutugot met ni Board Member Nancy Corazon M. Bacurnay, chairman ti Sangguniang Panlalawigan Committee on Education, dagiti kameng ti LUFPTA a makitinnulong iti probinsial a gobierno tapno makaited ti oportunidad kadagiti umili ti La Union.
Indaulo ni La Union Schools Division Superintendent Dr. Rowena C. Banzon ti induction dagiti kabarbaro a nabutusan nga opisial ti LUFPTA nga isuda Jose “JP” Ping-ay Jr., presidente; Dra. Rowina C. Aguilen, bise-presidente iti Amianan; Shyla C. Cabebe, bise-presidente iti Abagatan; Pamela Mae R. Alejo, sekretaria; Donnie V. Navarro, tesorero; Gonzalo J. Abat Jr, auditor; ken Rodolfo W. Bucao, PRO.
Dagiti kabarbaro a miembro ti Board of Directors ket isuda Mario Abando, Laborty C. Lerot, Felix D. Leal, Ernesto P. Mata, Ruben H. Suguitan, Brenda Marie Gonzales, Delia A. Valdez, Cherry Lyne Flores, Noemi S. Lidem, Rolando Rosimo, Dra. Maritess Galacio, ken Benjie Rullepa. HANA JOSUA C. MARTINEZ, PITO-LU / ABN