Trapiko at kakulangan ng parking area, reklamo ng tao

September 25, 2017 Balitaktakan sa Amianan Opinion

“Bakit walang nagtatrapik na pulis, walang maparadahan, ano ba yan?” Ito ang kadalasang nagiging bukang bibig ng mga tao o ng mga motorista kapag sila ay nagkakaroon ng problema sa parking at trapiko.
Hindi lang mga residente ng Baguio at Benguet ang nagrereklamo, maging mga turista o bisita sa lungsod ay ito ang kadalasang reklamo nila. Bakit daw bawal ang magparada sa Session Road kapag 4pm na at umaalis na ang mga nakaparada na ikot ng ikot sa mga daan na kung saan ay dagdag pa sa volume ng trapiko na umiikot sa central business district (CBD), ang resulta… ayan sobrang trapik.
Mainam din ang panukala ni Ms. Venus Tan ng Turismo na ang mga turista na iwan ang kanilang mga sasakyan sa mga hotel at maglakad papunta sa mga mall, sa central business district, o sa mga parke ng lungsod, subalit hindi lahat ng turista ay kayang maglakad sa pataas at pababa na daan ng lungsod.
Ang isang suggestion ng isang residente ng Baguio ay magtalaga ng pwedeng pagparadahan sa CBD at sa loob ng Burnham Park na may bayad kada oras, isang napansin ng inyong lingkod ay ang parking area sa may Ganza, kung puno naman sa loob ay payagan ng magpark sa kahabaan ng Lake Drive sa isang bahagi upang magamit ito ng mga motorista na magpark.
Sa mga pulis naman, napansin ko lang na kapag sumasapit ang alas 4 ng hapon ay mas masipag pa silang magtanggal ng plaka kaysa magsagawa ng pagtatrapik, na kung saan ay ito ang ‘rush hour’ ng mga tao at ng mga sasakyan. Tuloy nababansagan sila na naghahabol ng quota para makalikom ng pampasweldo sa kanila ng lungsod.
Sana naman ireview ulit ng BCPO at ng city government ang kasalukuyang umiiral sa traffic scheme kasi sa pagkakaalam ko ito ay bunga ng isang ‘experimental’ lamang, meaning kung nagiging problema dapat irevise ng naayon sa ikagaganda ng trapiko sa lungsod.
May isang pulis na opisyal diyan sa trapiko na tila mabagsik daw magtanggal ng mga plaka at walang konsiderasyon. Sabi ko, hayaan niyo na at magreretire din yan at magiging ‘citizen’, tignan niyo kawawa lang yan dahil sa ginagawa niya kapag hindi na siya pulis dahil imbes na pakisamahan siya iiwasan siya ng mga taga-Baguio.
Hindi ko naman nilalahat ang pulis, mas marami ang matino sa mga taga-Baguio na pulis kung ikumpara sa ibang lugar gaya ng Caloocan, mas madaling kausapin ang mga pulis-Baguio pero talagang may ilan lang diyan na ‘istrikto’ raw.
Ang saganang akin lang ay tutukan sana ng mga pulis trapiko ang problema sa trapik at maging considerate sa mga parking areas lalo na kung yung lugar ay hindi naman ‘choke point’ area hayaan na natin na gawing parkingan kaysa sa ikot ng ikot, iyan pa ang makakadagdag sa volume ng trapiko. TFP