Ulpit ni Ka Ompong
Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan sukimi.
Sakbay man nga intay rugian a lukaisan manen dagiti bambanag a nasken a malukaisan nga isyu, adda man istoryaek. Nangngegko ngamin a saritaan ti ina ken balasangna tunggal lumabasak iti balayda no mapanakon agubra, kuna diay anak:
Anak: Nanang pudno kadi a saan a matay ti umuna.
Ina: Pudno anak.
Anak: Kasanu nga ibagayo dayta?
Ina: Salbag, agingga ita di met laeng matay ni tatangmo.
Di wow!
Agingga kadagitoy, adu pay laeng ti anniniwan ti ilalabas ni Ka Ompong. Adu pay laeng ti saan a naisubli ti atep ti babbalayda, dagiti nagduduma a nadadel, dagiti la unay kakabsat a mannalon, ti nadadael iti benneg ti agrikultura.
Adu’t agkurkuranges ta piman aya ta pinaparintumeng wenno pinagiladna dagiti pagayda a kadawdawa wenno mangal-ala pay laeng bagasna. Dagiti mula a mais nangruna iti probinsia ti Isabela, nadeppesdan a di pay la mabalin a burasen ti bungada. Sumagmamanu laeng dayta kadagiti anniniwan ti kinaulpit ni Ompong. Ngem kas nakuna tayon iti immuna a kolum tayo, awan rumbeng wenno sabali a pabasolentayo no di ket tao met laeng gapu’t kinaranggas tayo.
Ditoy probinsia ti Benguet addansa pay laeng dagiti saan a na-rekober a bangkay dagiti nagaburan iti landslide a napasamak iti maysa nga ili, dagita ti makapaseggar nga anniniwan ti panagsingir ti nakaparsuaan. Kunatayo a naulpit dagita a didigra ngem, kas nakunatayo, gapu’t kinaranggas met laeng ti tao, ditay inilala dagiti parabur ti Namarsua. Imbes a saluadan, saan, no di ket rinanggasan, rinames tayo kangrunaan dagiti bambantay, kinalbotayo ket ditay met sinukatan babaen iti intay panagmula.
Kuna dagiti dadduma, dagiti minero ti pabasolenda gapuanan kanu dagiti dadakkel a kompania ti panagminas ngem, ti makunami, saanen a nasken nga agpipinnabasol tayo ta no utoben, adda amin kontribusion tayo iti pannakadadael ti kinangayed ti nakaparsuaan wenno aglawlaw. Kuna dagiti managsukisok ken managpaliiw iti panawen ken klima, dakkelen ti nagbaliwanna, ti Global Warming a ti epektona ket climate change. Opsss, saanka nga aglibbi ikit Kuanang ta uray dakayo ket adda paset wenno kontribusion yo iti ibabaran ti panawen? Bibiangko kunam ngata ngem ti laengen panagpuormo kadagiti basuram iti arubayan ket dakkel ti madi nga epektona iti climate change wenno global warming.
Maulit-ulit dagitoy a topiko tayo, ti kayatmi laeng koma ket adda met tignay ti gobierno taypo tapno maisubli ti kinangayed ti nakaparsuaan. Uliten tayo manen ti napasamak idiay Naga City, Cebu, kuna dagiti residente a ti kanu nabuldozer wenno mabulbuldozer ta pagbilinen da a subdibision ngem, dida kinonsider ti pannakadadael ti bantay isu nga idi nagsingir ti nakaparsuaan, nagbalin a biktima dagiti inosente nga agindeg sadiay. Isu a gising, agriing tayon kailian sakbay a maladaw ti amin.
Sus nalpas ti ani, anak ti tukling a balo, kasta pay kakayong ta ne overtime tayo manen ket…ala, aglisi ka man dita Atong. Ania man ta isensenyasmon, anunsio iti hueteng? Agingga ita, dayta pay laeng ti ubram, ala, ala, kalagem ngarud tay opisyal a takrot! Kasta pay ket ne, nakaadu tayo manen, babayoo, tsup tsup muahmuah.
The health of the President
October 9, 2018