11 mangngalap, nakemmeg iti illegal fishing

June 25, 2017 Headlines

SIUDAD TI SAN FERNANDO, La Union – Naaresto dagiti 11 a mangngalap gapu iti illegal fishing sadiay San Fernando Bay ti Barangay Poro idi Mierkoles, Hunio 21, 2017.
Naala manipud kadagiti mangngalap ti 25 kilos ti nagduduma nga ikan nga agarup P4,100 ti gatadna, upat a fishing vessels ken sabali pay a mausar nga agkalap.
Segun kenni Florycel Obeña, city fishery officer, nakemmeg dagiti mangngalap kabayatan ti seaborne patrol iti 4am dagiti kameng ti city police station, provincial ken city Disaster Risk Reduction Management Council, coastguard, maritime police, ken City Agriculturist Office.
Kinuna ni Obeña a natiliw dagiti mangngalap gapu iti illegal entry, no permit for fishing activity a panaglabsing iti city ordinance partikular iti “use of vessel in fishing without license within the territorial waters.”
Nabigbig dagiti mangngalap nga isuda Roberto Galvez, 26; Richard Cabato, 30; Joseph Cabato, 42; Marlon Cabuñas, 41; Gabriel Cabuñas, 49; Jeonard Soriano, 27; Gregorio Ramirez, 27; Christian Ramirez, 23; Franklin Ramires, 30; Ernesto Galvez Jr., 35; ken Jaymark Jacildo, 26, residente amin iti Barangay Pilar, Bauang, La Union.
Naipan dagiti mangngalap iti city police station ken nadusa maibasar iti City Fishery Ordinance nga agmulta ti P5,000 kada bilog ken P1,000 tunggal mangngalap.
Dagiti naala nga ikan ket naibunong kadagiti charitable institutions. ERWIN BELEO / ABN